OBP nis trajnimet për përdorimin e platformës së prokurimeve
TIRANË, 13 gusht/ATSH/ Ministrja e Ekonomisë dhe Inovacionit, Delina Ibrahimaj bëri të ditur nisjen e ciklit të trajnimeve të Operatorit të Blerjeve të Përqendruara (OBP) për përdorimin e platformës prokurimet.obp.al.
Sipas Ibrahimajt, trajnimet synojnë njohjen e institucioneve kontraktore me funksionalitetet e platformës dhe lehtësimin e procesit të paraqitjes së kërkesave për prokurim.
Gjatë sesioneve, përfaqësuesit e institucioneve njihen me hapat për krijimin dhe administrimin e kërkesave, plotësimin e informacionit dhe dokumentacionit përkatës, si dhe dërgimin dhe ndjekjen e statusit të tyre në sistem.
Në kuadër të trajnimeve zhvillohen edhe demonstrime praktike të funksioneve kryesore të platformës dhe sesione pyetje-përgjigje për adresimin e çështjeve teknike dhe procedurale.
Ibrahimaj theksoi se platforma prokurimet.obp.al përbën një hap të rëndësishëm drejt digjitalizimit dhe standardizimit të komunikimit ndërmjet OBP-së dhe autoriteteve kontraktore, duke synuar rritjen e efikasitetit, transparencës dhe gjurmueshmërisë në administrimin e kërkesave për prokurim.
Ministrja informoi se, OBP do të vijojë organizimin e trajnimeve dhe ofrimin e mbështetjes për institucionet, me qëllim garantimin e një përdorimi sa më të thjeshtë dhe efektiv të platformës.
/e.xh/j.p/r.e/