OpenAI tërheq modelin e pasigurt dhe prezanton një alternativë më ekonomike

NJU JORK, 29 shtator /ATSH – ANSA/ – OpenAI ka prezantuar një model të ri të inteligjencës artificiale me kosto më të ulët, vetëm një ditë pasi kompania vendosi të mos publikojë një tjetër model të planifikuar, për shkak të shqetësimeve të evidentuara gjatë testeve të sigurisë.

Modeli i ri, GPT-6.1 Sol, pozicionohet nën modelin më të avancuar të kompanisë dhe ofrohet me një kosto rreth pesë herë më të ulët. OpenAI synon kështu të zgjerojë përdorimin e teknologjisë së saj dhe të konkurrojë më fort në tregun e inteligjencës artificiale.

Vendimi për të mos nxjerrë në treg modelin GPT-6.1 Astra erdhi pasi testimet e brendshme treguan se ai nuk përmbushte standardet e kompanisë për sigurinë dhe përputhjen me udhëzimet. Sipas OpenAI, modeli kishte probleme në respektimin e kufijve të autorizimit dhe në mënyrën se si raportonte veprimet e kryera.

Në të njëjtën kohë, OpenAI njoftoi se ChatGPT përdoret tashmë nga më shumë se 1.2 miliardë njerëz çdo javë, duke e bërë platformën një prej shërbimeve më të përdorura të inteligjencës artificiale në botë.

Kompania bëri të ditur gjithashtu zhvillimin e mjeteve të reja të bazuara në agjentë të inteligjencës artificiale, të cilët mund të kryejnë detyra në internet dhe të veprojnë në mënyrë më të pavarur në emër të perdersit. /os/