PS lajmëron protestë, PD miting festiv

Kreu i Grupit Parlamentar demokrat Astrit Patozi u shpreh se Edi Rama është shkaktari kryesor i krizës në Shqipëri. Sipas tij Asambleja e mbledhur prej tij tregoi dhe njëherë se nuk mund të presim asgjë nga kjo parti dhe nga kreu i saj. "U shqiptuan të njëjtat sllogane për gjoja transparencën dhe u theksua edhe një herë se grupi parlamentar i Partisë Socialiste nuk do të lejohet të dalë nga kutia. Gjeneratori i dëshpërimit, që po mban peng prej gati 8 muajsh forcën e vet politike, na tregoi edhe një herë, se nuk ka ndërmend t'u japë mundësitë deputetëve të përfaqësojnë me dinjitet në parlament zgjedhësit e tyre", u shpreh Patozi. Kreu i grupit parlamentar demokrat tha se dëshirat e një njeriu nuk mund të mbajnë peng aspiratat kombëtare, dhe të kthehen në një dramë të vendit tonë. Ndërkaq ne kemi ndërmend të festojmë më 1 maj, me një entuziazëm që Tirana nuk do ta ketë njohur ndonjëherë më parë.Patozi tha se me këtë festë do të nderojmë punën e përbashkët të gjithë shqiptarëve, lajtmotivin e reformave të kësaj mazhorance, sukseset tona që na kanë bërë të jemi anëtarë të denjë të NATO-s, që po mundësojnë liberalizimin e vizave dhe po rrisin shpejtësinë drejt Bashkimit Europian.". Deklarata erdhi menjëherë pas Asamblesë Kombëtare të Partisë Socialiste dhe deklarimit të kreut të grupit të saj parlamentar Gramoz Ruci.