Pakistan intensifikon lëvizjet për bisedimet SHBA–Iran. Shefi i ushtrisë mbërrin në Teheran me mesazh nga Uashingtoni
Një delegacion ushtarak i nivelit të lartë i udhëhequr nga shefi i ushtrisë së Pakistanit, Feldmarshal Asim Munir, mbërriti sot në Teheran si pjesë e përpjekjeve të Islamabadit për të ringjallur bisedimet mes Shteteve të Bashkuara dhe Iranit, pas raundit të parë të negociatave që përfundoi pa marrëveshje javën e kaluar.
Vizita e Munir vjen ndërsa Pakistani po luan rolin e ndërmjetësit mes dy palëve, duke përcjellë mesazhe të ndërsjella dhe duke synuar të ngushtojë hendekun mbi çështjet kyçe si programi bërthamor iranian, lehtësimi i sanksioneve dhe e ardhmja e Ngushticës së Hormuzit, rrugë strategjike e energjisë e bllokuar nga Teherani që prej fillimit të konfliktit.
Media shtetërore iraniane raportoi se delegacioni pakistanez “po sjell një mesazh të ri nga Uashingtoni për Teheranin” dhe pritet të zhvillojë takime me zyrtarë të lartë iranianë mbi negociatat e ardhshme.
Në të njëjtën kohë, kryeministri pakistanez Shehbaz Sharif nisi një tur diplomatik katër-ditor në Arabinë Saudite, Katar dhe Turqi, ku do të takohet me liderë rajonalë, përfshirë princin e kurorës Mohammed bin Salman dhe presidentin Rexhep Tayyip Erdogan. Vizita synon forcimin e marrëdhënieve bilaterale dhe koordinimin rajonal përpara një raundi të dytë të mundshëm bisedimesh SHBA–Iran.
Presidenti amerikan Donald Trump deklaroi të martën se do të preferonte që negociatat pasuese të zhvilloheshin në Pakistan dhe se ato mund të ndodhin “brenda dy ditëve të ardhshme”.
Bisedimet e 11 prillit në Islamabad, të cilat zgjatën mbi 20 orë, ishin kontakti më i lartë i drejtpërdrejtë mes zyrtarëve amerikanë dhe iranianë në më shumë se një dekadë, por përfunduan pa marrëveshje për shkak të dallimeve të thella mbi kufizimet bërthamore dhe garancitë e armëpushimit.
Ndërkohë, Arabia Saudite njoftoi se do t’i ofrojë Pakistanit një mbështetje financiare prej 3 miliardë dollarësh, duke forcuar rolin e Islamabadit si aktor kyç në diplomacinë rajonale.
/rtsh.al/