Pakistan, talebanët përgjegjës për sulmin në një bazë ajrore

Talebanët në Pakistan kanë marrë përgjegjësinë për një sulm të armatosur në një bazë të madhe ajrore të marinës pakistaneze në Karaçi ku mbetën të vdekur pesë persona dhe u shkatërrua një numër i madh i avionëve të marinës.

Luftimet janë raportuar të kenë vazhduar edhe në mëngjes në Mehran, më shumë se tetë orë pas sulmit që nisi të dielën në mbrëmje.

Zëdhënësi i talebanëve, Ehsanullah Ehsan citohet nga Reuters dhe AFP të ketë thënë se sulmi është hakmarrje ndaj vrasjes së liderit të Al Kaidës, Osama bin Laden, i cili u vra gjatë një sulmi amerikan në territorin pakistanez tre javë më parë.

Sulmuesit raportohet se kanë hapur zjarr në avionët e stacionuar në bazë, përfshirë edhe një aeroplan vëzhgimi amerikan, ndërsa raporohet për një numër shpërthimesh dhe zjarresh.

Zyrtarët thonë se në sulm janë përfshirë të paktën 15 persona të armatosur.