Pasuria arkitekturore e Kukësit, arti shekullor i ndërtimit për kullat mes bjeshkëve

Për malësorët e aneve tona, kulla ishte jo vetëm një strehë për familjen, por simbol i mikpritjes, bujarisë dhe qëndresës. Vetë mënyra e ndërtimit të saj dhe planimetria janë një pasuri e rrallë.

Edhe pse një pjesë janë të rrënuara, ende përcjellin hijeshinë për nga mënyra se si janë ndërtuar dhe sa madhështi përcjellin edhe sot. Muret e gurit ngjasojnë me muret e kalave që arrijnë deri në një metër gjerësi.

Misin Doçi, banor në Arren thotë se ustallarët ishin nga Mirdita e për kullat është përzgjedhur gur i veçantë.

“Është vet lloji i gurit, dhe ustallarët kanë qenë mirditor”, u shpreh ai.

Punimi i gurit është shumë i vështirë por mjeshtërit ia kanë dalë gjithmonë për të nxjerrë të tilla kryevepra arkitekturore.

Vepra të tilla monumentale, duhet të studiohen e jo vetëm të ruhen thotë profesor doktor Shefqet Hoxha.

“Kulla ka shërbyer për banim, për mikpritje, për bisedime dhe lidhje traktatesh”, tha  ai.

Kullat e të tilla përmasave janë ndërtuar thuajse në të gjitha fshatrat e krahinës së Lumës, veçanërisht në zonat malore të saj.

Gazetar: B. Muçmata 

/rtsh.al/