Përmbytje në Durrës, uji “pushton” rrugët dhe trotuaret, vështirësi në qarkullim

Vendi ynë është përfshirë nga moti i keq, me reshje shiu që kanë shkaktuar përmbytje në disa zona të qytetit të Durrësit.

Prezencë e konsiderueshme uji është konstatuar në rrugë dhe trotuare, duke krijuar vështirësi në qarkullimin e automjeteve dhe këmbësorëve.

Problematika janë evidentuar edhe në disa kryqëzime pranë stadiumit “Niko Dovana”, në lagjen nr. 18, ku grumbullimi i ujit po vështirëson lëvizjen.

Situata më problematike paraqitet në lagjen nr. 1, në aksin që lidh shëtitoren “Taulantia” me zonën e Currilave.

Ndërkohë, sipas parashikimeve meteorologjike, reshjet e shiut pritet të vijojnë gjatë ditës, kryesisht me intensitet të ulët dhe lokalisht mesatar.

Në veriperëndim të vendit nuk përjashtohen edhe shtrëngata afatshkurtra të shoqëruara me shkarkesa elektrike.