Plagosjet me armë 25-vjeçari te Vasil Shanto

Tiranë, 30 Mars NOA Një person ka mbetur i plagosur pak minuta më parë në afërsi të shkollës Vasil Shanto në Tiranë pasi u qëllua me armë zjarri, raporton një burim në vendngjarje për agjencinë NOA.

Viktima është Spartak Cama, rreth 25 vjeç, lindur e banues në kryeqytet. I plagosur rëndë në qafë me plumba pistolete, ai është dërguar menjëherë në Spitalin Ushtarak, por mjekët ende nuk janë shprehur për gjendjen e tij.

Ngjarja ndodhi në momentet që ambienti përreth ishte i tejmbushur me klientë lokalesh dhe kalimtarë.

Në vendngjarje momentalisht ndodhen shumë forca policore. Një burim policor i tha agjencisë NOA se dyshohet një person të ketë hapur zjarr ndaj Spartak Camës, pas një sherri ku u përfshinë disa djem të rinj, por motivet ende nuk janë të qarta. Policia tha se po punon për kapjen e autorit të plagosjes.

e.r/NOA