Plaurent Dervishaj burg përjetë, Meçaj 35 vite – vendimi për atentatin ndaj Arjan Ndojës

Gjykata e Posaçme ka pranuar kërkesën e SPAK dhe ka dënuar me burg përjetë Plaurent Dervishajn, si dhe me 35 vite burg Julian Meçajn, të akuzuar për atentatin ndaj ish-prokurorit Arjan Ndoja, ngjarje e ndodhur rreth 7 vite më parë.

Vendimi vjen pas hetimeve të Prokurorisë së Posaçme, e cila ka ngritur akuza për organizim dhe ekzekutim të një atentati të mirëplanifikuar ndaj ish-zyrtarit të drejtësisë.

Sipas prokurorisë, Plaurent Dervishaj, i konsideruar si pjesë e së ashtuquajturës “banda e Durrësit”, dyshohet se ka qenë organizatori i atentatit, ndërsa Julian Meçaj është identifikuar si një nga personat që ka qëlluar në drejtim të automjetit ku ndodhej Ndoja.

Prokurori i Posaçëm, Andand Xholi, ka deklaruar se të pandehurit kanë vepruar në bashkëpunim edhe me persona të tjerë të përfshirë në çështje penale të ndara, mes tyre:

• Bledar Polovina
• Amar Shkëmbi (alias Dritan)
• Ramazan Rraja
• Endrit Sinani
• Genti Nderjaku
• Bashkim Haxhija
• Julian Pjetri

Këta persona po gjykohen në procese të veçanta.

Atentati ndaj ish-prokurorit Arjan Ndoja ndodhi më 1 nëntor 2019, kur ai po udhëtonte me automjet së bashku me shoferin e tij dhe Aleksandër Lahon, i njohur me nofkën “Rrumi”, një personazh i lidhur me botën e krimit të organizuar dhe aktualisht në kërkim.

Sipas dosjes hetimore, automjeti u qëllua me armë zjarri në lëvizje, duke rrezikuar seriozisht jetën e personave që ndodheshin brenda.

Të dy të pandehurit janë arrestuar më herët në Dubai dhe janë ekstraduar drejt Shqipërisë në gusht 2024, ku janë përballur me akuzat e ngritura nga SPAK.

Pas procesit gjyqësor, Gjykata e Posaçme ka shpallur vendimin për dënimet maksimale ndaj tyre.