Policia njofton kufizime të qarkullimit për koncertin “YE” në Kashar, ja akset që do të bllokohen

Drejtoria Vendore e Policisë Tiranë ka bërë të ditur se, në kuadër të zhvillimit të aktivitetit muzikor “YE”, që do të mbahet sot në zonën e Kasharit, do të zbatohen masa të posaçme për menaxhimin e trafikut, duke përfshirë kufizime të përkohshme të qarkullimit në disa akse rrugore.

Sipas njoftimit, nga ora 07:00 deri në 24:00 do të ndalohet qarkullimi në aksin dytësor të autostradës Durrës–Tiranë, nga zona e “Eiffel” deri te “Casa Italia”. Ky segment do të jetë i aksesueshëm vetëm në sens daljeje për subjektet që ushtrojnë aktivitet në këtë zonë.

Në të njëjtin interval kohor do të bllokohet edhe korsia e daljes së autostradës Durrës–Tiranë, në rrethrrotullimin e “Casa Italia”.

Ndërkohë, nga ora 12:00 deri në 24:00, nuk do të lejohet qarkullimi në segmentin “Casa Italia” – rruga “Pavarësia” – rruga “Sokrat Miho”. Kufizime do të ketë edhe në segmentin rruga “Sokrat Miho” – rruga “Kasem Shima” – rruga “7 Nëntori”, i cili do të funksionojë vetëm me sens daljeje.

Sponsorizuar

Policia paralajmëron gjithashtu se në aksin nga Ura e Institutit deri te “Casa Italia” mund të krijohen bllokime të pjesshme, në varësi të fluksit të pjesëmarrësve, me qëllim garantimin e mbarëvajtjes së aktivitetit dhe menaxhimin e trafikut.

Gjatë zbatimit të këtyre masave, në zonat e kufizuara do të lejohen të qarkullojnë vetëm automjetet e emergjencës dhe mjetet e Policisë së Shtetit.

Policia e Tiranës u bën thirrje drejtuesve të mjeteve të planifikojnë lëvizjet e tyre, të përdorin rrugë alternative dhe të respektojnë udhëzimet e efektivëve të Policisë të angazhuar në terren.r.k