Polonia, Souza: Shqipëria, një kundërshtar “robust”

Polonia do të përballet me Shqipërinë më 2 shtator 2021, në atë që është e para e 3 sfidave eliminatore të Grupit I të Botërorit “Katar 2022”, që do të luhen në 10-ditëshin e parë të muajit të ardhshëm. Dhe trajneri Paulo Souza nuk ka iluzione se çfarë kundërshtari e pret.

 “Unë e kam të qartë se çfarë strategjia apo dinamikë loje duhet të ndjekim ndaj Shqipërisë. Homologu im, Edoardo Reja, është një trajner me mjaft përvojë, që e njeh mirë këtë lojë dhe që ka bërë mjaft mirë me Shqipërinë. Është një skuadër e barazpeshuar, mjaft e organizuar dhe që luan, sipas mendimit tim, mjaft ngjeshur, me lojtarët pranë njëri-tjetrit. Prandaj do të jetë mjaft e vështirë për ne që ta çajmë këtë skuadër të ngjeshur.”)

Portugezi i stolit polak ka një strategji të qartë për ta fituar këtë ndeshje.

 “Për këtë arsye, na duhet të luajmë shpejt dhe ta qarkullojmë topin, të vertikalizojmë lojën tonë dhe të shkojmë në zonën e tyre sa më shpejt. Po ashtu na duhet të jemi të fortë, do të kemi shumë beteja inviduale, si jashtë, por sidomos brenda zone, për të gjetur hapësira dhe për të finalizuar. Duhet të kemi minimalisht të njëjtin intensitet si kundërshtari ynë, invidualisht dhe si gruë, sepse Shqipëria është një ekip mjaft intensiv, sidomos kur del nga mbrojtja në sulm. Nuk ka dyshime që ne kemi më tepër cilësi sa i përket grupit tonë të lojtarëve dhe shpresoj që lojtarët tanë më të mirë të frymëzohen dhe të na udhëheqin drejt fitores.”)

Në konferencën për shtyp krahas trajnerit ka qenë edhe qendërmbrojtësi veteran, Kamil Glik.

 “Shkojmë në ndeshjen me Shqipërinë duke i respektuar ata. E dimë se çfarë janë në gjendje të bëjnë dhe e kemi analizuar mirë lojën e tyre. Është një skuadër e fortë, me nuanca italiane në lojën e saj. Por e kemi marrë seriozisht këtë ndeshje dhe duam rezultat pozitiv.”)

Hëpërhë, skuadra e Souzës mban vendin e 4-t në renditje, me 4 pikë, pas një fitoreje, një barazimi dhe një humbjeje të marrë në 3 ndeshjet e para.