Pranimet në universitete, më 6 tetor rihapen aplikimet për formularin A1Z në “e-Albania”

TIRANË, 2 tetor/ATSH/ Ministria e Arsimit do të rihapë aplikimet për plotësimin e formularit A1Z në portalin e-Albania për kandidatët që dëshirojnë të aplikojnë në raundin e tretë të pranimeve në institucionet e arsimit të lartë.

Aplikimet do të kryhen më 6 tetor, nga ora 08:00 deri në orën 16:00, përmes portalit “e-Albania”.

Formulari A1Z mund të plotësohet nga të gjithë kandidatët që dëshirojnë të marrin pjesë në raundin e tretë të aplikimeve për programet e studimit në universitetet publike.

Kandidatët që synojnë të vijojnë studimet universitare dhe që plotësojnë kriteret për aplikim duhet të kryejnë procedurën brenda orarit të përcaktuar, duke plotësuar formularin përkatës në portalin e shërbimeve elektronike.

Rihapja e aplikimeve u jep mundësi kandidatëve që nuk kanë mundur të aplikojnë në fazat e mëparshme, ose që dëshirojnë të marrin pjesë në procesin e raundit të tretë, të shprehin preferencat e tyre për programet e studimit.

Pas përfundimit të aplikimeve, procesi do të vijojë me procedurat për përzgjedhjen dhe regjistrimin e kandidatëve, sipas rregullave dhe afateve të përcaktuara për raundin e tretë të pranimeve universitare.

/k.s/j.p/r.e/