Presidenti Begaj dekreton 16 ministra të kabinetit të ri qeverisës
TIRANË, 15 shtator/ATSH/ Presidenti Bajram Begaj, me propozim të Kryeministrit Edi Rama, dekretoi sot ministrat e qeverisë së re, si dhe i përcolli dekretet Kuvendit të Shqipërisë për kompetencë.
Procedura për emërimin e qeverisë së re do të përmbyllet në përputhje me Kushtetutën në ditët në vijim, me betimin e Kryeministrit dhe të ministrave, pasi Kuvendi të miratojë programin dhe përbërjen e Qeverisë. Gjatë kësaj seance maratonë, Kryeministri Rama pritet të prezantojë edhe programin qeverisës të mandatit të katërt.
Në një njoftim për medie nga zyra e shtypit e Presidencës, bëhet e ditur se ceremonia e betimit mbi Kushtetutë e kabinetit të ri qeveritar, do të zhvillohet në Institucionin e Presidentit të Republikës.
Presidenti Begaj dekretoi sot 16 nga 17 ministrat e kabinetit të ri qeveritar të propozuar nga kryeministri Rama, i cili gjatë Asamblesë Kombëtare të PS-së propozoi edhe ngritjen dhe funksionimin e Ministrit Virtual të Inteligjencës Artificiale “Diella”. Por sipas njoftimit për mediet nga Presidenca, ministrja e parë virtuale nuk është mes emrave të dekretuar nga Kreu i Shtetit.
Interesit të medieve lidhur me këtë çështje, Presidenca sqaroi më datë 12 shtator, ditë në të cilën Begaj dekretoi Edi Ramën si Kryeministër, se: “Dekretimi i Kryeministrit bëhet sipas propozimit të partisë fituese në zgjedhje. Neni 2 i dekretit e ngarkon Kryeministrin me një funksion specifik, gjithashtu sipas të njëjtit propozim. Sa i takon referencave për nenet 102 dhe 103, Kryeministri i plotëson kushtet dhe kërkesat e parashikuara në këto dy nene”.
Presidenti Begaj dekretoi emërimin e Këshillit të Ministrave:
Belinda Balluku, Zëvendëskryeministër dhe Ministër i Infrastrukturës dhe Energjisë
Albana Koçiu, Ministër i Punëve të Brendshme
Elisa Spiropali, Ministër për Evropën dhe Punët e Jashtme
Petrit Malaj, Ministër i Financave
Blendi Gonxhja, Ministër i Turizmit, Kulturës dhe Sportit
Sofjan Jaupaj, Ministër i Mjedisit
Mirela Kumbaro Furxhi, Ministër i Arsimit
Evis Sala, Ministër i Shëndetësisë dhe Mirëqenies Sociale
Delina Ibrahimaj, Ministër i Ekonomisë dhe Inovacionit
Besfort Lamallari, Ministër i Drejtësisë
Pirro Vengu, Ministër i Mbrojtjes
Andis Salla, Ministër i Bujqësisë dhe Zhvillimit Rural
Ervin Demo, Ministër i Shtetit për Pushtetin Vendor
Majlinda Dhuka, Ministër Shteti dhe Kryenegociator
Adea Pirdeni, Ministër i Shtetit për Administratën Publike dhe Antikorrupsionin
Toni Gogu Ministër i Shtetit për Marrëdhëniet me Parlamentin.
/m.m/j.p/r.e/