Presidenti, Nano: Mbetem i vetëofruar për klasën politike

Fatos Nano ka reaguar menjëherë pas tërheqjes së kandidatit zyrtar të mazhorancës Artan Hoxha duke përsëritur se mbetet i vetëofruar për klasën politike shqiptare dhe publikun shqiptar për të patur mundësinë për të synuar konsensusin, ose për të garuar e për ta fituar këtë garë.

Në një deklaratë për shtyp, Lëvizja “Nano” e cilëson si një turp procesin e përzgjedhjes së presidentit të ri të vendit. “ Fatos Nano po ndjek me vëmendje të gjithë këtë kaos total që po shkaktojnë Kryetarët e Partive të cilët tashmë për shkak të llogarive e axhendave të tyre të ngushta partiake, po e kthejnë proçesin e zgjedhjes së Presidentit të Republikës, në një proçes të turpshëm dhe në një rrezik të madh për fatet e vendit dhe të integrimit europian. Turp dhe vetëm turp mund të konsiderohet gjithçka po ndodh me proçesin e zgjedhjes së Presidentit. Turp sepse ka arratisje nga serioziteti. Turp sepse ka arratisje nga përgjegjshmëria. Turp sepse ka arratisje nga integrimi. Turp sepse ka arratisje nga Europa. Turp sepse ka arratisje nga gara e lirë dhe e ndershme. Turp sepse ka arratisje nga konsensusi. Turp sepse ka arratisje fatale nga atdhedashuria” thekson lëvizja “Nano”.
 

Gjithashtu Nano ka bërë thirrje Partisë Socialiste që të ngrihet në lartësinë që kërkon momenti, e të mos i shmanget e as druhet garës. “Fatos Nano i bën thirrje Partisë Socialiste që së bashku me Fatos Nanon duke bashkuar traditën, historinë, vlerat më të mira të Partisë Socialiste në këto 22 vite, ta fitojmë këtë garë bashkë, bashkë, bashkë. Fitorja e përbashkët e sotme le të jetë parathënie e hyrjes në historinë fituese të mëtutejme për Partinë Socialiste, për të gjithë shqiptarët, për Shqipërinë. Së bashku të bëjmë fituese Shqipërinë” thuhet në deklaratë.

Gjithashtu lëvizja “Nano” thekson se ky është moment që përtej dështimit të sotëm, Kryetarët e Partive, gjithësesi të ngrihen përmbi honet e llogarive të ngushta politike partiake që fundosin Shqipërinë, dhe të lartësohen me përgjegjshmëri të lartë kombëtare në nivelin e parimeve të atdhedashurisë për ta ngritur Shqipërinë në meritën e vlerën që i takon si një vend Europian.