Prodhuan dhe shitën kanabis, AMP arreston 1 punonjës policie dhe 3 shtetas

TIRANË, 27 maj /ATSH/ Agjencia e Mbikëqyrjes Policore ka arrestuar një punonjës policie dhe 3 shtetas për prodhim dhe shitje të narkotikëve.

AMP (Rajoni Fier-Berat) njoftoi sot se në kuadër të hetimit proaktiv me metoda speciale, i cili u finalizua gjatë operacionit të datës 24 maj me arrestimin në flagrancë të 4 shtetasve (mes tyre një punonjës policie) dhe procedimin e 2 shtetasve të tjerë, të dyshuar për “Prodhim dhe shitje e narkotikëve”, ka kryer veprimet hetimore, duke bërë të mundur sigurimin e të dhënave, nga të cilat është ushtruar kontroll në një banesë të marrë me qira nga punonjësi i policisë L. G., ku u gjetën dhe u sekuestruan në cilësinë e provës materiale një sasi prej 500 gr lëndë e dyshuar narkotike cannabis sattiva.

Nga hetimet e AMP-së ka rezultuar se punonjësi i policisë L. G. e përdorte banesën me qëllimin për të magazinuar lëndën narkotike.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier.

AMP thekson se, mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të Policisë së Shtetit, duke telefonuar në numrin e gjelbër 0800 90 90.

/r.e/