Prokuroria në Stamboll kërkon dënimin me 8 vjet e 9 muaj burg për kryebashkiakun Imamoglu
Prokuroria turke ka propozuar një dënim prej tetë vitesh e nëntë muajsh burg për kryebashkiakun e Stambollit, Ekrem Imamoglu, në lidhje me një çështje që ka të bëjë me diplomën e tij.
Imamoglu akuzohet për falsifikim dokumentesh në lidhje me shkollimin, ndërkohë që ndjekja penale ndaj tij po shihet edhe në një kontekst politik, për shkak të pozicionit të tij si rival i mundshëm ndaj presidentit Erdogan.
Çështja ka ngjallur reagime të forta në opinionin publik dhe në radhët e opozitës në Turqi.
Në aktakuzën e prokurorit thuhej se “Ekrem Imamoglu e mori diplomën me mashtrim” dhe “mori pjesë në krimin e falsifikimit”.
Imamoglu u transferua nga Universiteti Amerikan i Kyrenias në Shkollën e Administrimit të Biznesit të Universitetit të Stambollit, dhe Prokuroria e Stambollit argumentoi se transferimi ishte i parregullt dhe se diploma e tij ishte e pavlefshme.
Më 18 mars, administrata e Universitetit të Stambollit njoftoi se kishte anuluar diplomat e 28 personave.
Avokati i Imamoglut, Mehmet Pehlivan, njoftoi më 6 maj se kishte ngritur një kundërpadi për diplomën e anuluar dhe po atë ditë, Universiteti i Stambollit fshiu informacionin në lidhje me diplomën e Imamoglut nga baza e të dhënave e universitetit.
Imamoglu po mbahet në burgun Marmara në Silivri.
/rtsh.al/