Protestat, Balla e drejton gishtin nga fqinjët: Të bindur që duhet të ndërtohet në Zvërnec
Kreu i grupit parlamentar të Partisë Socialiste Taulant Balla, përballë gazetarëve në studion e “Opinion”, ka folur mbi qëndrimin e qeverisë për protestat dhe investimin e planifikuar për në Zvërnec.
Balla tha se protestat u nxitën qëllimisht nga vendet armiqësore me Shqipërinë, kryesisht Irani duke pasqyruar në rrjete sociale harta fallco të Zvërnecit e duke nxitur idenë e strehimit në atë zonë të emigrantëve palestinezë.
“Është e drejtë e çdo qytetari të protestojë. Qëndrimi ynë ka qenë i qartë. Nëse ditën e parë kishte qytetarë që dolën të protestojnë realisht, sot janë një grupim i vogël që morën peng protestën. Nuk kam asnjë dyshim që, nga historia sesi lindi algoritmi i kësaj proteste, sesi u sponsorizua… Protesta, përpara se të fillonte, pati një invadim të rrjeteve sociale me disa harta fallco, sesi në Zvërnec do të kishte një kufi mes Shqipërisë dhe Izraelit, ku në pjesën e projektit do të vendoseshin emigrantë nga Gaza”, tha Balla.Por interes kundër këtij investimi që parashikohet të kapë shifrën e 4 miliardë dollarëve, janë dhe fqinjët, thotë Balla, për shkak të prekjes së interesave në fushën e turizmit.
“Ishte një faqe që thërriste “Iran Military”, me regjistrim në Bangladesh, e cila në mënyrë të vazhdueshme postonte çdo ditë harta të rreme lidhur me atë që po ndodhte në Zvërnec. Kjo ka qenë që në ditët e para të majit. Një pjesë e qytetarëve u çuan dhe nga ai akt dhune i një punonjësi të sigurisë ndaj një qytetari protestues. Sot një pjesë e njerëzve u qartësuan. Nuk ka dyshime që dhe interesat e fqinjëve që e shohin ndërtimin e një projekti të asaj vlere në bregdetin shqiptar si një prekje të interesave të tyre në sektorin e turizmit.Ka ndonjë dyshim që të paktën Irani ka qenë prezent me sulme kibernetike? Gjithmonë, sa herë ka pasur një gjë që lidhet me Shqipërinë, unë besoj që Rusia ka qenë e interesuar për të dëmtuar. Të gjitha këto vende jo miqësore kanë qenë të përfshira në rastin në fjalë”, tha Balla.
Ndër të tjera, kreu i grupit parlamentar të PS, tha se qeveria është e bindur për të vijuar me ndërtimin në Zvërnec, por zhvillimi është ende në fazat paraprake dhe se ende nuk ka një zyrtarizim të formës sesi do të procedohet më tej.