Protestat në Izrael, turmat përballen me policinë kundër miratimit të ligjit në drejtësi
Policia izraelite u përlesh me turmat e protestuesve gjatë natës pasi parlamenti miratoi një ligj për të kufizuar kompetencat e Gjykatës së Lartë.
Masa, pjesë e një pakete të madhe reformash do të parandalojë gjykatën të rrëzojë veprimet e qeverisë që i konsideron të paarsyeshme.
Policia izraelite përdori ujë për të shpërndarë protestuesit që bllokonin autostradat. Kritikët thonë se reformat e qeverisë së djathtë kërcënojnë demokracinë izraelite.
Pas muajsh protestash masive në rrugë për reformën në drejtësi, votimi i së hënës në parlament ishte një fitore e rëndësishme për kryeministrin Benjamin Netanyahu.
Por një grup mbikëqyrës politik dhe kreu i opozitës qendrore Yair Lapid planifikojnë t’i bëjnë kërkesë Gjykatës së Lartë për të anuluar ligjin e ri.
Për më tepër, konfederata e sindikatave të Histadrutit të Izraelit ka kërcënuar me një grevë të përgjithshme dhe mijëra rezervistë ushtarakë, duke përfshirë pilotët e forcave ajrore, janë zotuar se nuk do të paraqiten në detyrë nëse ligji lejohet të zbatohet.
Netanyahu ka këmbëngulur se ligji është i nevojshëm që qeveria “të zbatojë politikën në përputhje me vendimin e shumicës së qytetarëve të vendit” citon BBC.
/rtsh.al/