Pushohet mjeku, dha ilaçe për shërimin e homoseksualizmit

Një mjek australian është pushuar nga puna pasi lëshoi ilaçe për të kuruar një adoleshent nga homoseksualizmi.

Mjeku 75 vjeçar, Mark Cradocck, nga Sidnej, u gjet fajtor për sjellje të pakënaqshme profesionale gjatë trajtimit të një 18 vjeçari.

Mjeku, që është i specializuar në fushën e radiologjisë, dhe pacienti i tij janë anëtarë të një grupi konservator kristian, që e privojnë veten nga radio, televizioni dhe interneti dhe që nuk votojnë.

Në një letër drejtuar komisionit të ankesave pranë Kujdesit Shëndetësor, adoleshenti shkroi se ai zbuloi se ishte homoseksual në moshën 18 vjeçare. Më pas drejtuesi i kishës i tha se ka mjekim për problemin e tij dhe e dërgoi tek mjeku në fjalë. Ai i lëshoi me recetë Cyprostat, një ilaç që përdoret për të trajtuar kancerin e prostatës dhe për të reduktuar testosteronin, duke menaxhuar kështu devijimin seksual.

Komisioni tha se doktori nuk kreu një shqyrtim mjekësor të rastit dhe nuk e dërgoi djaloshin pranë një psikologu.

Mjeku i pranoi përfundimet e raportit të komisionit.