Putin: Perëndimi po dështon, e ardhmja është në Azi

Presidenti Vladimir Putin duke folur në Forumin Ekonomik Lindor në qytetin rus të Paqësorit, tha se Perëndimi po dështon sepse një përpjekje e kotë dhe agresive për të izoluar Rusinë me sanksione po shkatërronte ekonominë globale ashtu si Azia po ngrihej për të kërkuar të ardhmen.

Shtetet e Bashkuara dhe aleatët e tyre vendosën sanksionet më të rënda në historinë moderne ndaj Rusisë për atë që Putin e quan një operacion të posaçëm ushtarak në Ukrainë. Putin thotë se sanksionet janë të ngjashme me një shpallje të luftës ekonomike.

Putin tha se sanksionet perëndimore ndaj Rusisë kishin zëvendësuar pandeminë COVID si kërcënimin kryesor për ekonominë globale.

“Po flas për ethet e sanksioneve të Perëndimit, me përpjekjen e tij të pacipë, agresive për të imponuar modele sjelljeje mbi vendet e tjera, për t’i privuar ata nga sovraniteti i tyre dhe për t’i nënshtruar vullnetit të tyre”, tha Putin.

Në një përpjekje për t’i rezistuar rrjedhës së historisë, vendet perëndimore po minojnë shtyllat kryesore të sistemit ekonomik botëror të ndërtuar gjatë shekujve,” tha Putin, duke shtuar se besimi në dollar, euro dhe stërlina po binte.

Rusia dërgoi dhjetëra mijëra trupa në Ukrainë më 24 shkurt në atë që e quajti një operacion special për të degraduar aftësitë ushtarake të fqinjit të saj jugor dhe për të çrrënjosur njerëzit që i quajti nacionalistë të rrezikshëm.

Forcat ukrainase kanë ngritur rezistencë të ashpër. Asnjëra palë nuk ka bërë të ditur se sa ushtarë janë vrarë.

Përpjekja e Perëndimit për të izoluar ekonomikisht Rusinë – një nga prodhuesit më të mëdhenj në botë të burimeve natyrore – e ka shtyrë ekonominë globale në ujëra të paeksploruara me çmime në rritje të ushqimit dhe energjisë.

Kjo ka dëmtuar edhe Rusinë.

Putin tha se Perëndimi po përpiqej të impononte vullnetin e tij në botë, por se fuqia e tyre ishte në rënie, pasi qendra e rritjes globale ishte tani në Azi.

“Ndryshime të pakthyeshme dhe madje tektonike kanë ndodhur përgjatë marrëdhënieve ndërkombëtare”, tha Putin. “Roli i vendeve dhe rajoneve dinamike, premtuese të botës, kryesisht rajoni Azi-Paqësor, është rritur ndjeshëm.

Midis të ftuarve në forum ishte ligjvënësi më i lartë i Kinës Li Zhanshu, aktualisht i renditur në vendin e tretë në Partinë Komuniste Kineze.

Putin tha se Kina do të paguajë Gazprom për gazin e saj në monedha kombëtare, bazuar në një ndarje 50-50 midis rublës ruse dhe juanit kinez.

Putin tha gjithashtu se ekonomia e Rusisë po përballej me atë që ai e quajti agresionin financiar dhe teknologjik të Perëndimit, por pranoi disa vështirësi në disa industri dhe rajone.

rtsh.al/