Rama: Draft-rezoluta e PE-së vlerëson progresin e Shqipërisë dhe synimin për mbyllje negociatash brenda 2027
Kryeministri Edi Rama theksoi se draft-rezoluta e publikuar nga Parlamenti Europian për Shqipërinë është një vlerësim i qartë i progresit të vendit.
Sipas Ramës, dokumenti vlerëson hapjen e të gjithë grup-kapitujve brenda 13 muajve, një rekord në historinë e integrimeve europiane, duke nënvizuar ritmin e shpejtë dhe ambicien që negociatat të përfundojnë brenda vitit 2027.
“Draft-rezoluta e publikuar nga Parlamenti Europian për vendin tonë është një vlerësim i qartë për progresin e Shqipërisë.
Ai dokument vlerëson hapjen e të gjithë grup-kapitujve brenda 13 muajve, gjë që përbën një rekord në historinë e integrimeve europiane dhe në ndërkohë theksohet ritmi i shpejtë dhe domethënës në procesin e negociatave me nënvizimin rreth ambicies sonë që negociatat të mbyllen brenda vitit 2027, duke evidentuar progresin në forcimin e institucioneve demokratike, shtetin e së drejtës, reformën socio-ekonomike, politikat mjedisore, bashkëpunimin rajonal dhe përputhshmërinë me politikën e përbashkët të jashtme dhe të sigurisë të BE-së.
Kjo draft-rezolutë është një tjetër sinjal shumë i rëndësishëm për publikun tonë: Shqipëria po ecën me ritëm, me qëndrueshmëri dhe me qartësi strategjike në drejtimin e duhur. Të njëjtën gjë konfirmuan edhe takimet që delegacioni pluralist i Parlamentit Europian zhvilloi në Tiranë gjatë kësaj jave”, theksoi Rama.
/rtsh.al/