Rama: Shoqëri e përbashkët mes shtetit dhe biznesit për administrimin e Parkut Metalurgjik
TIRANË, 28 mars/ATSH-Maela Marini/ Kryeministri Edi Rama, në një bashkëbisedim me bizneset e interesuara për t’u bërë pjesë e territorit brenda Parkut Metalurgjik, u ndal te mënyra se si do të funksionojë ky park.
Rama kërkoi që bizneset të zgjedhin një përfaqësi për të përcjellë kërkesat e tyre.
“Ne duhet të kemi edhe një ide të qartë nga ju, në mënyrë që të ketë një komunikim dhe partneritet me bashkinë dhe Korporatën Shqiptare të Investimeve, që të krijohet një ide e qartë dhe të vendosen piketat e bashkëpunimit”, tha Rama.
Kryeministri theksoi se duhet të bihet dakord paraprakisht mbi hapësirat që kërkon secili biznes në mënyrë që bashkë me arkitektët të përcaktohen ato hapësira që ka shteti në funksion të biznesit.
“Duhet të përcaktojmë metodën si do të punojmë bashkërisht, por edhe nëse ju doni të qëndroni thjesht në pjesën e biznesit tuaj apo do të dëshironi të bëheni pjesë e strukturës që do merret me të gjithën”, tha Rama.
Sipas kryeministrit, Parku do të menaxhohet nga një shoqëri e përbashkët mes shtetit, bashkisë dhe bizneset mund të bëhen pjesë e kësaj shoqërie.
“Nuk ju thotë njeri të merrni barrën kryesore, por mund të hyni si partner në atë shoqëri. Unë jam absolutisht i vetëdijshëm edhe se çfarë duhet të bëjmë ne që ju të keni garancinë e zgjerimit”, shtoi Rama.
/a.f/