Rama pas takimit me diasporën: Hapim një kapitull të ri vëllazërimi dhe rendi evropian me Greqinë

TIRANË, 12 maj/ATSH/-Kryeministri Edi Rama ka reaguar pas takimit historik që zhvilloi sot me komunitetin shqiptar në stadiumin ‘Galatsi’ në Athinë,

Rama i ka falenderuar të gjithë emigrantët shqiptarë që morën pjesë në këtë takim, duke u shprehur se u bënë shembëlltyra e një zemre gjigande shqiptare që rrahu anembanë vendit fqinj.

Kreu i qeverisë shqiptare deklaron se “realiteti i ri që ka krijuar afirmimi qytetar i shqiptarëve të Greqisë, si edhe realiteti i afirmuar i grekëve të Shqipërisë, na e ka vënë mu përpara syve ftesën e urtë për ta parë të shkuarën përmes të ardhmes”.

Reagimi i plotë i Ramës në rrjetet sociale:

🇦🇱FALEMINDERIT NGA ZEMRA🇬🇷🇪🇺

*Para nisjes për Tiranë nga Athina, pas përjetimit në çdo qelizë të frymës së thellë të atdheut mes shqiptarëve të Greqisë dhe me ndjenjën më të hatashme të mirënjohjes, për të gjithë ata që u derdhën lumë drejt Stadiumit Galatsi, ku u bënë shembëlltyra e një zemre gjigande shqiptare, që rrahu anembanë vendit fqinj, duke e shfaqur sot Shqipërinë me të gjithë krenarinë legjitime të bijve e bijave të saj dhe me dëshirën e fortë për të hapur, sipas porosisë së Naimit tonë një kapitull të ri vëllazërimi, rendi europian e paqeje me prosperitet me Greqinë, ku realiteti i ri që ka krijuar afirmimi qytetar i shqiptarëve të Greqisë, si edhe realiteti i afirmuar i grekëve të Shqipërisë, na e ka vënë mu përpara syve ftesën e urtë për ta parë të shkuarën përmes të ardhmes, e jo më anasjelltas, nëse duam bashkarisht që më në fund, Shqipëria dhe Greqia të bëjnë për popujt e tyre, atë që popujt e tyre kanë bërë për njëri-tjetrin përgjatë historisë🙏

UNË BESOJ❤️🖤❤️🤍💙