Rama takon Blair: Kemi ndihmën e kryeministrit që ka lënë gjurmë në histori

LONDER - Kryeministri i zgjedhur, Edi Rama është takuar sot paradite me ish-kryeministrin e Britanisë së Madhe, Toni Blair, me të cilin ka diskutuar për rreth 2 orë lidhur me piketat e para të qeverisjes.

Ish-kryeministri britanik Tony Blair shprehu besimin e tij se qeveria e re shqiptare do të kapërcejë sfidat që e presin përpara. Ish-kryeministri Blair e uroi Ramën për fitoren e zgjedhjeve të 23 qershorit, ndërsa theksoi se ky është një moment i rëndësishëm për Shqipërinë.

Uroj Ramën për fitoren e jashtëzakonshme. Ky është një moment i rëndësishëm për Shqipërinë, për të qenë së bashku për një qeverisje të re dhe një program të ri. Komuniteti ndërkombëtar i uron qeverisë së re suksese. Sfidat e vendit janë të mëdha, por ka vendosmëri për kapërcimin e tyre. Duhet ta dini se keni një mbështetje shumë të madhe nga komuniteti ndërkombëtar që ta kryeni me sukses detyrën tuaj.- deklaroi Blair në perfundim të takimit.

Nga ana e tij, lideri i PS-së, Edi Rama shprehu kënaqësinë për takimin me zotin Blair, të cilin e cilësoi si mik të shqiptarëve. Rama vlerësoi ndihmën që ish-kryeministri britanik do ti ofrojë qeverisjes së re shqiptare, duke thenë: Kemi ndihmën e kryeministrit që ka lënë gjurmë në historinë e Anglisë dhe të botës.

Është një kënaqësi shumë e madhe që takimin parë pas zgjedhjeve jashtë Shqipërisë, unë e bëj me një njeri të madh, që përveçse për çka njihet, është dhe një pikë referimi e kahershme e imja dhe e jona, si PS. Ndërkohë jam shumë i lumtur që kjo fitore na jep mundësinë që të kemi ndihmën e këtij miku të madh, të një kryeministri që ka lënë gjurmë në historinë e Anglisë dhe botës mbarë dhe një njeriu që nuk harron asnjëherë të përsërisë që është një mik i madh i Shqipërisë dhe shqiptarëve.- u shpreh Rama.

RAMA NË FACEBOOK: TAKIMI PER PIKETAT E PARA TE QEVERISJES
Në përfundim të takimit, kryesocialisti Rama, përmes faqes së tij zyrtare në rrjetin social ‘Facebook, theksoi se në fokus të bisedës me ish-kryeministrin britanik ishin piketat e para të qeverisjes.

Takim pasionues rreth 2 orë me km Blair për piketat e para të qeverisjes.- shkruan Rama në Facebook, ku publikoi edhe një fotografi të takimit.

Vetëm disa javë para zgjedhjeve të përgjithshme, Rama zhvilloi një takim me Blair, të cilin e ka njohur me programin për një “Rilindje Shqiptare” dhe prioritetet e qeverisjes së majtë pas 23 qershorit. Gjatë këtij takimi, një temë e rëndësishme e bisedës ishte propozimi i Partisë Socialiste për taksimin e ndershëm, si dhe sistemin universal shëndetësor, bazuar në eksperiencën e suksesshme britanike.

Kryesocialisti Rama kërkoi mbështetjen e Blair dhe ekspertizën e tij për qeverisjen e pas 23 qershorit, ftesë e cila u pranua me kënaqësi nga ish-kryeministri britanik.
“Do të jem shumë i lumtur tju ndihmoj ju. Vendi juaj është një vend për të cilin kam shumë interes”, – e ka siguruar kreun e PS-së, ish-kryeministri laburist.