“Reforma e ujit i hap rrugë korrupsionit”, Berisha akuza për nismën e qeverisë: Aksioni opozitar në mbrojtje të qytetarit

Projekti i shpallur nga kryeministri Edi Rama për ngritjen e një Operatori Kombëtar të Ujit konsiderohet nga kryedemokrati Sali Berisha si një përpjekje për të grabitur paratë e ujësjellësve.

Për Berishën, skema e ujit është e njëjtë me atë që z. Rama lançoi pak ditë më parë për trajtimin e mbetjeve pas projektit të incineratorëve.

“Edi Rama, pasi shpenzoi 400 mln dhe e quajti reformën e të gjitha reformave, atë të plehut, u katandis si gjel mbi pleh, duke paraqitur para pak ditësh, një alternativë krejt tjetër, pa djegës dhe incinerator, ndonëse e garantoj se flakët e djegësit të Tiranës, do ta ndjekin gjithë jetën atë,” tha kryetari i Partisë Demokratike.

Për kreun demokrat, çdo nismë e shefit të qeverisë ka në themel korrupsionin. Nëse e kundërta do të ishte e vërtetë, sfidon z. Berisha, Shqipëria nuk do të ishte e fundit në rajon dhe Europë për nivelin e pagave.

“Kthehemi në vitin 1992. Shqipëria përjetoi epideminë e zgjebes në mbarë vendin. Nuk mund ta blejë ai më. 35 euro për një DASH pluhur. Shikoni djathin, e keni tre herë më shtrenjtë se në SHBA. E keni dy herë e gjysmë më shtrenjtë se në Greqi. Po këto janë gjërat më elementare. Pra, rroga minimale mbetet ajo, në një kohë kur të gjitha mjetet e higjienës, të gjitha produktet ushqimore rriten mbi mesataret e çmimeve në BE,” u shpreh ai.

Ndërsa shqiptarët nuk shpërblehen me paga dhe pensione dinjitoze, i vetmi që bën përjashtim, sipas z. Berisha, është kreu i SPAK-ut, Altin Dumani, me një pagë, sipas tij, rreth 7 mijë euro.

“Troplini merr sa 15 rroga minimale. Imagjinoni ju një punëtor i thjeshtë në SKAP, e cila rrit 3–4 fëmijë, dhe bosi Troplini merr 15 herë më shumë se ai apo ajo. Këto janë parime çnjerëzore të përcaktimit të pagave,” theksoi z. Berisha.

Ndërsa i komenton pagën, tregohet indiferent për vizitën e z. Dumani në SHBA.

“Nuk kam asnjë dijeni se kë ka takuar dhe kë nuk ka takuar,” tha ai.

Lajmi që qarkullon në mjediset mediatike, se opozitës në legjislaturën e re mund të mos i jepet drejtimi i Komisionit të Integrimit, bazuar në një marrëveshje të kahershme politike mes palëve, kishte mbërritur te kryedemokrati.

“Edi Rama bën gjithçka që të mbyllë kanalet e komunikimit dhe zërin e opozitës. Por të garantoj që është i dështuar dhe do të dështojë,” nënvizoi kreu demokrat.

Opozita do të përcaktojë aksionin politik për legjislaturën e re, megjithatë z. Berisha ende nuk zbulon për mediet se kur do e zhvillojë mbledhjen e parë me grupin e ri parlamentar.

Gazetare: Anisa Kadesha

/rtsh.al/