Regjistrimet në shkollat e Hasit – Afro 180 nxënës në klasën e 1-rë, po aq dhe në klasën e 10-të

Në Has, që nga data 14 korrik janë regjistruar rreth 100 nxënës, të cilët do të ulen për herë të parë në bankat e shkollës.

Jetmir Qaushi, specialist pranë ZVA Has, bën të ditur se sipas të dhënave pritet që deri në mbylljen e procesit të regjistrohen rreth 179 nxënës.

Sa i përket regjistrimit në klasën e 10-të, përmes portalit e-Albania priten të regjistrohen 182 nxënës.

Ndërkohë që për prindërit që kanë hasur vështirësi në regjistrim, nuk ka munguar ndihmesa nga drejtoritë e shkollave.

“Zyra arsimore në bashkëpunim me drejtoritë e shkollave ka marrë të gjitha masat që t’u vijë në ndihmë prindërve të cilët ndoshta e kanë të pamundur aksesimin në forma të ndryshme në e-Albania, për t’i regjistruar fëmijët e tyre,” thotë z. Qaushi.

Sipas të dhënave, bëhet e ditur se edhe këtë vit shkollor nuk ka rënie të numrit të nxënësve të regjistruar në krahasim me vitin e kaluar. Sa u përket nxënësve të klasave të 10-të, shumë prej tyre po zgjedhin arsimin profesional në Gjakovë.

Regjistrimi në klasën e parë dhe të dhjetë do të vijojë deri më 31 gusht. Ndërkohë, dita e parë e shkollës për vitin e ri shkollor të arsimit parauniversitar do të jetë 8 shtatori.

Gazetare: Shkurte Elezaj

/rtsh.al/