Rusia po armatosë Algjerinë dhe Turkmeninë

Rusia do t'ua dorëzojë Algjerisë dhe Turkmenisë 130, gjegjësisht 30 tanke T-90, me vlerë të përgjithshme prej 500 milionë dollarëve, shkruan gazeta ekonomike ruse,"Vedomosti".

Marrëveshja për blerjen ishte lidhur mes kompanisë ruse për eksport të armëve "Rosoborneksport" dhe dy shteteve, të cilat druajnë nga revolucionet të cilat e përfshinë botën arabe, nga vera e vitit të kaluar, shton gazeta.

Rusia në vitin 2010 i shiti dhjetë tanke T-90 Turkmenisë dhe 185 Algjerisë.

Këto marrëveshje janë lidhur në prag të rritjes së destabilitetit në rajon, pas revolucionit në Tunizi dhe Egjipt dhe luftës në Libi, deklaroi një burim i afërt me "Rosoborneksport".

Armata ruse nga ana e saj refuzon t'i blejë këto tanke me çmim të lartë dhe kualitet të ulët, në krahasim me modelet e ngjashme gjermane dhe izraelite.

Komandanti forcave këmbësore, Aleksandar Postnikov, deklaroi në Këshillin e Federatës se të hollat për një T-90 mund të shfrytëzohen për t'u blerë tri tanke gjermane "Leopard".

Shefi i Shtatmadhorisë së armatës ruse, Nikollaj Makarov, në nëntor të vitit të kaluar deklaroi se T-90 dukshëm dallon nga karakteristikat e tankut izraelit "Merkava".