SHBA – Kërkesa e Arabisë Saudite për të blerë avionë F-35 kalon fazën e shqyrtimit të Pentagonit
UASHINGTON, 5 nëntor /ATSH/- Kërkesa e Arabisë Saudite për të blerë deri në 48 avionë luftarakë F-35 – ka kaluar fazën kyçe të shqyrtimit brenda Pentagonit, thanë dy burime të njohura me çështjen, duke shtuar se një marrëveshje është duke u shqyrtuar përpara vizitës së ardhshme të Princit të Kurorës Mohammed bin Salman në Shtetet e Bashkuara të Amerikës, sipas “Reuters”.
Shitja prej disa miliardë dollarësh – nëse miratohet – do të shënonte një nga ndryshimet më të rëndësishme në politikën e mbrojtjes së SHBA-së, në Lindjen e Mesme dhe mund të sfidonte angazhimin e hershëm të Uashingtonit për të ruajtur “avantazhin ushtarak cilësor” të Izraelit në rajon.
Sipas burimeve, Arabia Saudite i bëri një apel të drejtpërdrejtë presidentit amerikan, Donald Trump këtë vit, duke rishfaqur interesin e saj të hershëm për avionët e avancuar të Lockheed Martin.
Ndërsa kërkesa ka arritur në nivelin e sekretarit në Departamentin Amerikan të Mbrojtjes, kërkohen miratime të mëtejshme, duke përfshirë miratimin nga Kabineti i SHBA-së, presidenti dhe njoftimin zyrtar për Kongresin.
Një zyrtar amerikan i përfshirë në diskutime tha se nuk ishte marrë asnjë vendim përfundimtar dhe se procesi i përgjithshëm përfshinte disa hapa shtesë.
Izraeli mbetet përdoruesi i vetëm i F-35 në Lindjen e Mesme, duke e integruar avionin në skuadrone të shumta të forcave ajrore.
Aftësitë e fshehta të avionit lejojnë që ai të shmangë radarët e armikut, duke e bërë atë një nga avionët luftarakë më të sofistikuar aktualisht në shërbim.
Arabia Saudite, blerësi më i madh i armëve amerikane, i ka kërkuar avionët F-35 për vite me radhë – si pjesë e përpjekjeve për të modernizuar forcën e saj ajrore dhe për t’iu kundërvënë kërcënimeve rajonale, veçanërisht nga Irani.
Riadi historikisht ka vendosur në dispozicion një flotë të avionëve F-15 të prodhuar në SHBA, së bashku me “Tornado” dhe “Typhoon” të prodhuara në Evropë.
Kërkesa vjen ndërsa administrata Trump sinjalizon bashkëpunim më të thellë në mbrojtje me Arabinë Saudite dhe mbështetje të re për “Vizionin 2030” të Princit të Kurorës Mohammed bin Salman – një plan strategjik që përfshin modernizimin e aftësive ushtarake dhe industriale të Mbretërisë.
Edhe nëse marrëveshja merr miratimin formal ekzekutiv, do të kërkohet miratimi i Kongresit dhe disa ligjvënës kanë treguar se mund ta kundërshtojnë shitjen, duke përmendur shqetësimet e kaluara në lidhje me të drejtat e njeriut dhe stabilitetin rajonal. //a.i/