SHBA – Rubio: Ka disa “shenja pozitive” në negociatat me Iranin
UASHINGTON, 22 maj /ATSH-DPA/- Sekretari amerikan i Shtetit, Marco Rubio shprehu dje në mbrëmje optimizëm lidhur me përpjekjet diplomatike, për t’i dhënë fund luftës me Iranin, duke deklaruar se ka shenja përparimi, por paralajmëroi për rrezikun e pritshmërive të tepruara.
Duke folur para takimit të NATO-s në Suedi, Rubio tha se në negociata kishte disa shenja pozitive. Megjithatë, ai shtoi se nuk dëshironte të ishte “tepër optimist”.
Rubio përsëriti gjithashtu vlerësimin amerikan se sistemi drejtues i Iranit “është vetë disi i përçarë” dhe theksoi se presidenti amerikan Donald Trump preferon një zgjidhje të negociuar.
“Por, nëse nuk arrijmë një marrëveshje të mirë, presidenti e ka bërë të qartë se ka opsione të tjera”, tha Rubio.
Trump ka përsëritur së fundmi kërcënimet për sulme ushtarake ndaj Iranit, pasi negociatat për një fund të përhershëm të konfliktit – të nisur nga SHBA-ja dhe Izraeli në fund të shkurtit – janë bllokuar.
Më vonë, ai deklaroi se kishte shtyrë sulmin e ri amerikan, të planifikuar më herët gjatë kësaj jave, pasi sipas tij po zhvilloheshin negociata serioze.
Duke folur në Shtëpinë e Bardhë, Trump përsëriti se Irani duhej të dorëzonte rezervat e uraniumit të pasuruar në nivele të larta.
“Nuk do t’i lejojmë ta mbajnë atë”, tha Trump.
Fati i rreth 400 kilogramëve uranium të pasuruar në nivele të larta, që ndodhen në zotërim të Teheranit, është shfaqur si një nga pikat kryesore të mosmarrëveshjes në negociata.//a.i/