SHBA – Trump urdhëron mbylljen e bazës së të dhënave për sjelljet e pahijshme të policisë
UASHINGTON, 21 shkurt /ATSH-DPA/ – Një bazë e të dhënave mbarëkombëtare, që gjurmonte dhe arkivonte sjelljen e pahijshme nga oficerët e policisë amerikane, është mbyllur pas një urdhri të presidentit Donald Trump.
Një shënim në faqen e internetit të Departamentit të Drejtësisë thotë se Trump kishte revokuar një urdhër ekzekutiv të nënshkruar nga ish-presidenti Joe Biden dhe se Baza Kombëtare e të Dhënave të Përgjegjshmërisë për Zbatimin e Ligjit (NLEAD) do të çaktivizohej.
“Agjencitë e përdoruesve nuk mund të kërkojnë më ose të shtojnë të dhëna në NLEAD. Departamenti Amerikan i Drejtësisë po çaktivizon NLEAD në përputhje me standardet federale”, lexohej në shënim.
Trump propozoi krijimin e bazës së të dhënave gjatë mandatit të tij të parë në Shtëpinë e Bardhë, përpara se ajo të krijohej zyrtarisht nga Biden.
Baza e të dhënave u krijua si pjesë e reformave që erdhën nga protestat e vitit 2020 ”Black Lives Matter”, pas vrasjes së George Floyd.
Derek Chauvin, një ish-oficer policie në Minneapolis, përdori gjurin e tij për të shtrirë Floyd-in në tokë për më shumë se nëntë minuta në maj 2020.
Ai u dënua për vrasje dhe shkelje të të drejtave të Floyd./ a.jor.