SHBA dhe Koreja e Jugut nisin stërvitjen e përbashkët, Koreja e Veriut rrit kërcënimet
Shtetet e Bashkuara dhe Koreja e Jugut nisën stërvitjet e përbashkëta këtë të dielë (19 shkurt) duke iu përgjigjur testeve të fundit të raketave balistike të bëra nga Koreja e Veriut. SHBA ngriti në ajër bombarduesit supersonikë me rreze të gjatë në një shfaqje force për stërvitje të përbashkëta të veçanta me avionët luftarakë të Koresë së Jugut dhe japonezëve.
Kjo erdhi pasi Koreja e Veriut bëri testin e raketës balistike ndërkontinentale ku tha se kishte për qëllim të forconte më tej kapacitetin e saj të sulmit bërthamor “fatal” dhe kërcënoi hapa shtesë të fuqishëm mbi stërvitjet e ardhshme ushtarake midis Shteteve të Bashkuara dhe Koresë së Jugut.
Udhëheqësi koreano-verior Kim Jong Un po përdor stërvitjet e rivalëve të tij si një shans për të zgjeruar arsenalin bërthamor të vendit të tij.
Raketa balistike “Hwasong-15” arriti një lartësi maksimale prej rreth 5,770 kilometra duke fluturuar një distancë prej rreth 990 kilometra për 67 minuta përpara se të godiste me saktësi një zonë të paracaktuar në ujërat midis Gadishulli korean dhe Japonisë.
Bombarduesit amerikanë B-1B dhe avionët e tjerë u stërvitën veçmas me avionë luftarakë të Koresë së Jugut dhe Japonisë mbi dhe pranë Gadishullit Korean. Një deklaratë ushtarake e Koresë së Jugut tha se trajnimi ripohoi angazhimin e sigurisë “të veshur me hekur” të Uashingtonit ndaj Koresë së Jugut.
Koreja e Veriut është e ndjeshme ndaj vendosjes së bombarduesve amerikanë B-1B, të cilët janë në gjendje të mbajnë një ngarkesë të madhe armësh konvencionale.
Koreja e Veriut ka kritikuar me këmbëngulje stërvitjet e rregullta ushtarake Koreja e Jugut-SHBA si një provë pushtimi, megjithëse aleatët thonë se ushtrimet e tyre janë të natyrës mbrojtëse.
/rtsh.al/