SPAK çon në gjykatë dy inspektorë të ISHTI dhe një administrator biznesi për korrupsion
TIRANË, 18 nëntor/ATSH/ Prokuroria e Posaçme Kundër Korrupsionit dhe Krimit të Organizuar përfundoi hetimet dhe ka dërguar në Gjykatën e Posaçme të Shkallës së Parë, kërkesën për gjykim të procedimit penal nr. 44 të vitit 2025, ndaj dy inspektorëve të Inspektoratit Shtetëror Teknik Industrial, dhe një administrator biznesi për veprën penale të korrupsionit.
Sipas njoftimit për medie të SPAK, bëhet fjalë për:
– Julian Suljotin, administrator i subjektit privat “Ansoil sh. a” në Korçë, i akuzuar për veprën penale, Korrupsioni aktiv i personave që ushtrojnë funksione publike”;
– Olsi Jarazin, inspektor pranë Inspektoratit Shtetëror Teknik Industrial,(ISHTI), për veprën penale, “Korrupsioni pasiv i personave që ushtrojnë funksione publike”;
– Luan Sadikajn, ish-inspektor pranë pranë Inspektoratit Shtetëror Teknik Industrial, I(SHTI), për veprën penale, “Korrupsioni pasiv i personave që ushtrojnë funksione publike”.
Gjetjet e hetimeve
Nga hetimet proaktive me metoda speciale hetimore, të kryera nga hetuesit e Byrosë Kombëtare të Hetimit (BKH) rezulton se në datën 1.11.2021, të pandehurit Olsi Jarazi dhe Luan Sadikaj, me detyrë inspektorë të Inspektoratit Shtetëror Teknik Industrial (ISHTI), kanë marrë shumat monetare 900.000 (nëntëqind mijë) lekë dhe 10.000 (dhjetë mijë) dollarë nga shtetasi Julian Suljoti, administrator i një subjekti privat që tregëtonte vajra lubrifikantë në Korçë.
Shumë e parave është marrë për të mos ndëshkuar me masë administrative subjektin privat, i cili ushtronte aktivitetin tregtar pa dokumentacionin e nevojshëm tekniko-ligjor dhe licensën përkatëse.
Procedim penal është regjistruar mbi bazën e akteve të procedimit penal, nr. 385/1 të vitit 2023 të Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprat penale “Korrupsioni aktiv i personave që ushtrojnë funksione publike” dhe “Korrupsioni pasiv i personave që ushtrojnë funksione publike”, kryer në bashkëpunim, i cili është sjellë për kompetencë në Prokurorinë e Posaçme Kundër Korrupsionit dhe Krimit të Organizuar.
/a.f/r.e/