SPAK godet rrjetin ndërkombëtar të heroinës, trafik nga Suedia drejt Danimarkës, arrestohen dy të akuzuar në Shqipëri

Një rrjet i mirëorganizuar i trafikut ndërkombëtar të lëndëve narkotike, i cili operonte mes Shqipërisë, Suedisë dhe Danimarkës, është goditur falë një operacioni të përbashkët mes Prokurorisë së Posaçme (SPAK), autoriteteve daneze dhe Policisë së Shtetit. Gjatë këtij aksioni, u ekzekutuan dy masa sigurie në vendin tonë, ndërsa tre persona të tjerë janë proceduar më herët në Danimarkë.

Operacioni “Bacchus” dhe skema e trafikut të drogës

Hetimet për këtë grup kriminal nisën fillimisht nga autoritetet e drejtësisë daneze në muajin gusht të vitit 2023, nën dosjen nr. 0100-71282-00102-23, të koduar “Operacioni Bacchus”. Sipas të dhënave, ky rrjet shqiptaro-ndërkombëtar ishte i përfshirë në trafikimin dhe shpërndarjen e heroinës në tregun e Danimarkës, duke e importuar atë përmes kufirit me shtetin e Suedisë.

Aktiviteti i paligjshëm është dokumentuar për periudhën nga 1 tetori 2023 deri më 23 janar 2024, duke u faktuar në të paktën 7 episode të ndryshme trafiku.

“Lënda narkotike e trafikuar përgatitej për shitje në tregun danez e përzier me lëndë të tjera, si paracetamol dhe kafeinë, me qëllim maksimizimin e fitimeve nga anëtarët e grupit kriminal,” sqaron komunikata e SPAK.

Akuzat dhe masat e sigurisë nga Gjykata e Posaçme

Pas mbledhjes së provave nga Byroja Kombëtare e Hetimit (BKH) në koordinim me prokuroritë e dy vendeve, SPAK regjistroi procedimin penal nr. 55 të vitit 2024. Me kërkesë të prokurorisë, Gjykata e Posaçme e Shkallës së Parë (me vendimin nr. 28, datë 14 maj 2026), miratoi masat për dy shtetasit shqiptarë të identifikuar si pjesë e rrjetit.

Në operacionin e datës 14 maj 2026, Drejtoria e Përgjithshme e Policisë së Shtetit bëri të mundur ekzekutimin e këtyre masave:

Për shtetasin M. L. (alias G.), masë e sigurimit personal me karakter shtrëngues “Arrest në burg”.

Për shtetasin E. L., masat e sigurimit personal “Detyrim për t’u paraqitur në policinë gjyqësore” dhe “Ndalim i daljes jashtë shtetit”.

Të dy këta shtetas akuzohen për veprat penale “Prodhim dhe shitje e narkotikëve”, e kryer në formën e veçantë të grupit të strukturuar kriminal, si dhe për “Pjesëmarrje në grup të strukturuar kriminal”.

Ndërkohë që në Shqipëri u arrestuan dy persona, goditja e rrjetit në shtetin danez ishte kryer më herët.

“Nga hetimet paralele, deri në këto momente është bërë e mundur identifikimi dhe procedimi në Danimarkë i 3 personave (dy shtetas shqiptarë dhe një i huaj). Ndërkohë, hetimet vazhdojnë për administrimin e provave lidhur me implikimin e personave të tjerë, të cilët dyshohet se janë përfshirë në këto veprimtari,” thekson Prokuroria e Posaçme në deklaratën e saj, e cila falënderon publikisht autoritetet daneze për bashkëpunimin.

/rtsh.al/