Seanca në GJKKO/ Berisha: Do marr hapat ligjorë në mbrojtje të Kushtetutës
Ish-kryeministri Sali Berisha në një prononcim për media jashtë ambienteve të selisë blu, pak orë para seancës së posaçme në GJKKO, ku do të merret në pyetje në lidhje me privatizimin e ish-klubit “Partizani”, ka deklaruar se do ndërmarrë hapa ligjor në mbrojtje të Kushtetutës.
Berisha u shpreh se është i gatshëm të paraqitet në GJKKO në rast se do të respektohet Kushtetuta.
Ai deklaroi se piramida e trillimit, mashtrimit, falsifikimit, do të shembet.
“Do marr hapat ligjor në mbrojtje të Kushtetutës. Besoj se mënyra ime ishte e kthjelltë si kristali. Në çdo kohë, unë jam i gatshëm të paraqitem, siç jam paraqitur, për t’u pyetur.
Nuk shkel kushtetutën e vendit., jam autori i ligjit që kjo mbrojtje s’duhet të ekzistojë. Duhet të jenë të gjithë të barabartë. Jo ta menderosim kushtetutën.
Pra piramida e trillimit, mashtrimit, falsifikimit do të shembet dhe ju garantoj ju, e bazuar në falsifikim, fshehje dokumentesh dhe mashtrime, nuk pengoj asnjë proces gjyqësor, hetimor. Ky është një informalitet që buron nga Kushtetuta e vendit dhe unë nuk mund ta shkel”, u shpreh ai.
Gjykata e Posaçme e Shkallës së Parë kundër Korrupsionit dhe Krimit të Organizuar, njoftoi dje (23 tetor) caktimin e një seance të posaçme ku Berisha do të merret në pyetje si person nën hetim.
Nga ana e tij, Berisha nuk e njeh vendimin e Gjykatës së Posaçme Kundër Krimit dhe Korrupsionit, duke e quajtur antikushtetues dhe për këtë arsye nuk u paraqit ditën e djeshme (23 tetor) në gjykatë ç’ka detyroi që oficerët e policisë gjyqësore të mbërrijnë në shtëpinë e tij gjatë pasdites për t’i komunikuar sërish masën e sigurisë “detyrim paraqitje”.
Seanca është caktuar ndërkohë që dhëndri i Berishës, Jamarbër Malltezi ndodhet prapa hekurave për privatizimin e ish-kompleksit Partizani më shumë se një dekadë më parë.
Dhëndri i ish-kryeministrit Berisha akuzohet për korrupsion pasiv dhe pastrim parash pasi është favorizuar nga ish-kryeministri Berisha për të privatizuar ish-kompleksin e klubit sportiv “Partizani”.
Kujtojmë se ende Parlamenti nuk është shprehur në lidhje me këtë çështje.
/rtsh.al/