Shqipëria, dy marrëveshje të reja me OBT me fokus investimet dhe tregtinë elektronike

TIRANË 28 nëntor /ATSH/ Ministria e Ekonomisë, Kulturës dhe Inovacionit, përfaqësuar nga Zëvendësministrja Blerta Rama, mori pjesë në takimin e 8-të Rajonal të Platformës së Tregtisë dhe Investimeve të Unionit për Mesdheun, i cili u mbajt sot në Bruksel.

Ky takim mblodhi përfaqësues të tregtisë nga shtetet anëtare të Bashkimit Evropian, vendet e Ballkanit Perëndimor dhe ato të Procesit të Barcelonës.

Nën drejtimin e Komisionit Evropian, në këtë takim u diskutuan çështje të lidhura me tregtinë, si rregullat e origjinës preferenciale në kuadër të Konventës Rajonale PEM, të cilat Shqipëria i ka miratuar dhe tani po punon për miratimin e dispozitave tranzitore për vazhdimësinë e lehtësimit të tregtisë me partnerët tregtarë, deri në hyrjen në fuqi të rregullave të rishikuara në kuadër të Unionit për Mesdheun.

Një fokus i rëndësishëm i takimit ishin zhvillimet në kuadër të negociatave në Organizatën Botërore të Tregtisë (OBT) për dy marrëveshje të reja, Marrëveshja për Lehtësimin e Investimeve dhe Zhvillimin dhe Marrëveshja për Tregtinë Elektronike.

Në takim u theksua roli i këtyre marrëveshjeve në lehtësimin e tregtisë, rritjen e transparencës dhe parashikueshmërisë, krijimin e një mjedisi më të besueshëm ndërkombëtar për investimet dhe tregtinë elektronike, si dhe intensifikimin e investimeve.

1 nga 4

/a.f/