Shqipëria në Berlin, Ibrahimaj: Prioritet përputhja e aftësive me nevojat e tregut të punës

Në kuadër të Procesit të Berlinit, Shqipëria ka rikonfirmuar rolin e saj aktiv në rajon për reformimin e tregut të punës dhe zhvillimin e kapitalit njerëzor. Gjatë konferencës “Avancimi i Përbashkët i Politikave të Punësimit dhe Politikave Sociale”, Ministrja e Ekonomisë dhe Inovacionit, Delina Ibrahimaj, prezantoi strategjitë e vendit tonë për një treg pune gjithëpërfshirës dhe të modernizuar.

Lançimi i Planit të Përbashkët WB6

Ngjarja shënoi një moment kyç me nisjen zyrtare të Planit të Përbashkët të Punës për Ballkanin Perëndimor (WB6). Ky dokument dyvjeçar shërben si një udhërrëfyes për forcimin e bashkëpunimit rajonal dhe përafrimin e politikave sociale me standardet strikte të Bashkimit Evropian.

Gjatë pjesëmarrjes në panelin mbi nxitjen e punësimit, Ministrja Ibrahimaj vuri theksin te domosdoshmëria e adresimit të hendekut mes formimit profesional dhe kërkesave reale të bizneseve.

“Rëndësia primare qëndron te përputhja e aftësive me nevojat e tregut, rritja e aksesit në trajnime dhe forcimi i efikasitetit të shërbimeve publike të punësimit,” u shpreh Ibrahimaj.

Inovacioni dhe mbrojtja e punëmarrësve

Një shtyllë tjetër e fjalës së saj ishte integrimi i teknologjisë në shërbimet e punësimit. Ministrja nënvizoi se digjitalizimi nuk është thjesht një trend, por një mjet për të rritur konkurrueshmërinë dhe për t’i bërë shërbimet më të aksesueshme për qytetarët.

Po ashtu, vëmendje e veçantë iu kushtua standardeve të sigurisë në punë. Ibrahimaj evidentoi hapat që po ndërmerren për modernizimin e Inspektoratit të Punës përmes digjitalizimit të proceseve; rritjen e ndërgjegjësimit mbi të drejtat e punëmarrësve; përfshirjen e grupeve vulnerabël, grave dhe të rinjve përmes instrumenteve të dedikuara.

Bashkëpunimi rajonal si çelës suksesi

Në përfundim të konferencës, ku ishin të pranishëm përfaqësues nga Komisioni Evropian, Organizata Ndërkombëtare e Punës (ILO) dhe Këshilli i Bashkëpunimit Rajonal (RCC), Shqipëria rikonfirmoi angazhimin për të udhëhequr reformat në rajon.

“Bashkëpunimi rajonal dhe shkëmbimi i praktikave më të mira me partnerët evropianë janë thelbësore për zbatimin efektiv të këtij Plani të Përbashkët,” përfundoi Ministrja Ibrahimaj.

Ky takim në Berlin shënon një tjetër hap drejt integrimit ekonomik të Ballkanit Perëndimor, duke vendosur kapitalin njerëzor në qendër të rritjes së qëndrueshme.

/rtsh.al/