Stuhitë e rërës mbulojnë Pekinin dhe Kinën veriore, ndotja e ajrit shkon në nivele të rrezikshme
Një stuhi e fortë rëre ka përfshirë Pekinin dhe disa provinca veriore në Kinë, duke e mbuluar rajonin me re të dendura pluhuri portokalli dhe duke e çuar ndotjen e ajrit në nivele të rrezikshme.
Retë e dendura mbështollën kryeqytetin kinez, ku grimcat e ndotjes mund të hyjnë përmes hundës dhe të udhëtojnë në mushkëri, paralajmëruan autoritetet e Monitorimit të Mjedisit Ekologjik të Pekinit.
Autoritetet meteorologjike në Pekin paralajmëruan njerëzit që të mos dalin jashtë për stërvitje dhe aktivitete të tjera dhe u kanë kërkuar drejtuesve të mjeteve të qëndrojnë vigjilentë dhe të ulin shpejtësinë për shkak të dukshmërisë së ulët.
Qendra e monitorimit të Pekinit e quajti këtë si “stuhinë më të rëndë të rërës e ndodhur deri më tani për këtë vit”.
Pekini goditet rregullisht nga stuhitë e rërës në pranverë me smogun që përkeqësohet nga rritja e aktiviteteve industriale dhe shpyllëzimi i shpejtë në të gjithë Kinën veriore, raporton CNN.
Gati një duzinë provincash në Kinë lëshuan sinjale paralajmëruese të verdhë nga e mërkura deri të enjten herët në mëngjes. Kina përdor një sistem paralajmërues moti me katër nivele, ku e kuqja përfaqëson paralajmërimin më të rëndë, e ndjekur nga portokallia, e verdha dhe bluja.
Stuhia aktuale e rërës filloi nga Mongolia të martën dhe gradualisht u zhvendos drejt Kinës qendrore dhe lindore.
/rtsh.al/