Sulm me thikë e armë në Japoni, gjejnë vdekjen 3 persona
Një grua dhe dy oficerë policie gjetën vdekjen si pasojë e një sulmi me armë dhe thikë në Japoninë qendrore të enjten (25 maj).
“Policia mori një telefonatë në orët e vona të pasdites me raporte se një “burrë goditi me thikë një grua”, tha një zyrtar i policisë së qytetit Nakano për CNN.
Kur oficerët nxituan në vendngjarje, burri qëlloi me armë duke goditur katër persona, ndërsa gruaja u dërgua në spital ku më pas u konstatua e vdekur.
Transmetuesi publik NHK më vonë raportoi se dy policë vdiqën gjithashtu nga plagët e tyre dhe se një person tjetër u plagos.
Dhuna me armë është jashtëzakonisht e rrallë në Japoni. Vendi ka nivelet më të ulëta të krimeve me armë në botë për shkak të ligjeve të tij jashtëzakonisht të rrepta për kontrollin e armëve.
Në vitin 2018, Japonia, një vend me 125 milionë banorë, raportoi vetëm nëntë vdekje nga armët e zjarrit, krahasuar me 39,740 atë vit në Shtetet e Bashkuara, sipas të dhënave të përpiluara nga Shkolla e Shëndetit Publik të Sidneit në Universitetin e Sidneit.
Shinzo Abe, kryeministri më jetëgjatë i vendit, u qëllua për vdekje gjatë një fjalimi të fushatës në Nara në korrik.
Vrasja e tij shkaktoi valë tronditëse nëpër Japoni dhe komunitetin ndërkombëtar, dhe gjithashtu ngjalli pyetje nëse ekzistonte mjaftueshëm siguri për ta mbrojtur atë, pavarësisht historisë së Japonisë për të qenë një vend i sigurt.
Marrja e një arme zjarri në Japoni është jashtëzakonisht e vështirë dhe i dyshuari për të shtënat e Abe përdori një armë të bërë vetë.
/rtsh.al/