Sulm terrorist në Iran, gjashtë civilë të vrarë, mes tyre një nënë me fëmijën

Një sulm nga grupi separatist xhihadist Jaish al-Adl në një gjykatë në provincën juglindore të Iranit, Sistan-Baluchestan, ka vrarë të paktën gjashtë civilë, përfshirë një nënë dhe një fëmijë, dhe ka plagosur 22 të tjerë, raportuan mediat iraniane të shtunën.

Sulmuesit goditën ndërtesën, duke qëlluar një numër njerëzish brenda. Më pas ata nisën një sulm të dytë me mortaja dhe granatahedhës në gjykatë, ku filloi një përleshje me forcat e sigurisë që zgjati tre orë, sipas grupit të të drejtave të njeriut Baluch, Haalvsh.

Tre persona të armatosur u vranë në përleshje, tha agjencia shtetërore e lajmeve e Iranit.

Mediat shtetërore thanë se disa persona të plagosur në sulm ishin në gjendje kritike dhe ishin transferuar në spitalet lokale.

Jaish al-Adl mori përgjegjësinë për sulmin në një deklaratë në Telegram dhe u tha civilëve të evakuonin zonën “për sigurinë e tyre”.

Banorët raportuan se dëgjuan disa shpërthime dhe të shtëna me armë zjarri, ndërsa disa rrugë që të çonin në gjykatë ishin të mbyllura, raportoi Haalvsh.

Provinca Sistan-Baluçestan, e cila kufizohet me Pakistanin dhe Afganistanin, ka pasur një kryengritje të vazhdueshme gjatë dy dekadave të fundit.

Jaish al-Adl është një nga grupet militante islamike në provincë dhe ka luftuar forcat iraniane të sigurisë që nga viti 2014. Autoritetet iraniane e kanë shpallur organizatën një grup terrorist dhe kanë akuzuar Pakistanin dhe Izraelin për mbështetjen e grupit.