Sulmet kundër Homsit nuk kanë të ndalur

Homsi është në shënjestrën e bombardimeve të ushtrisë siriane. Aktivistët raportojnë për mbi 1000 familje të bllokuara, në qytetin në qendër të Sirisë, të cilat duhet të shpërngulen. Videot e aktivistëve të postuara në Internet, dëshmojnë ndërtesat të rrënuara dhe automjete të shkatërruara në lagjen Al Bajada dhe Guta.

Këshilli kombëtar Sirian paralajmëroi për një masakër të mundshme në Homs, qytet ky i rrethuar nga 30 mijë ushtare dhe milicë Shabiha.

Qyteti është një nga vatrat e nxehta të rezistencës kundër regjimit të Damaskut. Lagjja e Baba Amerit vuajti për thuajse një muaj rrethimin dhe bombardimet e ushtrisë siriane dhe në muajin shkurt u vu nën kontrollin e forcave pro-qeveritare.

Shtetet e Bashkuara nisën konsultimet me aleatët pas pezullimit të misionit vëzhgues të OKB-së në Siri. Gjenerali norvegjez, Robert Mood, deklaroi fundin e misionit si pasojë e përshkallëzimit të dhunës.

Zëdhënësi i Ligës Arabe, Ahmad Bin Hilli i tha BBC-së se vendimi është i përkohshëm dhe se operacionet mund të ndërpriten vetëm nga OKB duke u konsultuar me Ligën Arabe.

Të martën, gjenerali Mood do t’u raportojë për situatën në Siri pesë anëtarëve të përhershëm të Këshillit të Sigurimit, të cilët do të shqyrtojnë hapat e mëtejshëm që do të ndërmerren për misionin vëzhgues.