Sulmi i SHBA-së, Irani gati të mbyllë Ngushticën e Hormuzit! Rrezik për tregtinë globale të energjisë

Parlamenti iranian ka miratuar në parim propozimin për të mbyllur Ngushticën e Hormuzit – një nga korridoret më të rëndësishme për tregtinë botërore të naftës dhe gazit.

Sipas Reuters, vendimi përfundimtar do të merret nga Këshilli i Lartë i Sigurisë Kombëtare të Iranit, por deri më tani nuk është publikuar një afat zyrtar për zbatimin e masës.

Deklaratat nga zyrtarë të lartë iranianë e bëjnë të qartë se mbyllja e ngushticës është një opsion real.

Deputeti dhe komandant i Gardës Revolucionare, Esmaeil Kosari, deklaroi se, “Mbyllja e Hormuzit është në agjendën tonë dhe do të ndodhë kur të jetë e nevojshme.”

Ky zhvillim vjen vetëm pak orë pas sulmeve ajrore të SHBA ndaj objekteve bërthamore iraniane, duke zhvendosur krizën nga përplasjet ushtarake në një përballje ekonomike.

Ngushtica e Hormuzit, që lidh Gjirin Persik me Detin Arabik, përpunon rreth 20% të tregtisë globale të energjisë dhe është kanal kritik për eksportet e naftës nga Arabia Saudite, Irani, Emiratet dhe Iraku.

Autoritetet detare perëndimore janë tashmë në gjendje alarmi. UK Maritime Trade Operations (UKMTO) – dega e Marinës Mbretërore Britanike për sigurinë e anijeve tregtare – paralajmëroi për rrezik të lartë ndaj anijeve perëndimore në Detin e Kuq dhe Gjirin e Adenit.

Ekspertët paralajmërojnë se, nëse Irani mbyll realisht ngushticën, çmimet ndërkombëtare të naftës dhe gazit mund të pësojnë rritje të menjëhershme, me pasoja të mëdha ekonomike dhe gjeopolitike në mbarë globin.

/rtsh.al/