TEHERAN – Irani betonizon hyrjet e uzinave bërthamore nga frika e ndonjë sulmi

TEHERAN, 10 shkurt /ATSH-ANSA/ – Imazhet satelitore tregojnë se të gjitha hyrjet e tuneleve në centralin bërthamor të Isfahanit të Iranit janë rrethuar nga mure betoni, një shenjë e mundshme e shqetësimit të Teheranit për sulme të mundshme në vend.

Mediat izraelite si ‘’Times of Israel’’ dhe i24 e raportojnë këtë, duke cituar një raport të publikuar nga Instituti për Shkencë dhe Siguri Ndërkombëtare me seli në Uashington.

Instituti, i cili ka monitoruar prej kohësh centralet bërthamore iraniane, thotë se imazhet e së dielës tregojnë se dy nga hyrjet tani janë plotësisht të mbuluara, ndërsa hyrja e tretë, më veriore e kompleksit, përmban gjithashtu “masa shtesë mbrojtëse pasive”.

Organizata thotë se nuk vërehet asnjë aktivitet automjetesh në hyrje.

Instituti thotë se duket se Irani është i shqetësuar për mundësinë e sulmeve ose bastisjeve nga Shtetet e Bashkuara ose Izraeli, ose të dyja, në vend.

“Mbushja e hyrjeve të tuneleve do të ndihmonte në zbutjen e çdo sulmi të mundshëm ajror”, shpjegojnë ata, “dhe gjithashtu do ta bënte të vështirë aksesin në tokë në rast të një bastisjeje të forcave speciale për të sekuestruar ose shkatërruar çdo uranium të pasuruar shumë që mund të përmbahet brenda.

Përgatitje të tilla u vunë re për herë të fundit në ditët para Operacionit “Midnight Hammer”, i cili goditi uzinat Fordow, Natanz dhe Isfahan”, deklaron instituti.

Uzina e Isfahanit ishte e njohur kryesisht për prodhimin e gazit të uraniumit, i cili futet në centrifuga për t’u tjerrur dhe pastruar.

Irani ka miratuar masa shtesë të mbrojtjes civile në javët e fundit: 82 stacione metroje në kryeqytet janë transformuar në strehimore emergjence dhe janë pajisur me pajisje thelbësore mbijetese.

Zyrtarët iranianë thuhet gjithashtu se kanë filluar të grumbullojnë sasi të mëdha karburanti në kamionë për t’u përdorur si njësi të lëvizshme magazinimi në rast të një sulmi.   /os/