Tabaku takon të dërguarin e Trump/ Partneriteti me SHBA duhet të sjellë më shumë investime

Deputetja e Partisë Demokratike, Jorida Tabaku, është takuar me të dërguarin special të Presidentit amerikan Donald Trump për Partneritetet Globale, Paolo Zampolli, i cili ndodhet në Tiranë për një seri takimesh.

Përmes një postimi në Facebook, Tabaku e cilëson SHBA-në si një mike të palëkundur të Shqipërisë dhe e vendos në fokus forcimin e partneritetit mes dy vendeve.

Sipas saj, ky partneritet duhet të shoqërohet me më shumë investime amerikane në Shqipëri, më shumë mundësi për biznesin dhe vende të reja pune për shqiptarët.

Takimi me Tabakun është zhvilluar në kuadër të vizitës së Zampollit në Shqipëri. I dërguari amerikan ka zhvilluar gjatë ditës takime edhe me përfaqësues të tjerë të politikës shqiptare dhe të komunitetit bektashi.

Vizita e tij në Tiranë përkon me 35-vjetorin e rihapjes së Kryegjyshatës Botërore Bektashiane, ku Zampolli ka marrë pjesë në një aktivitet së bashku me përfaqësues të komuniteteve fetare në Shqipëri.

Në postimin e saj, Tabaku nuk jep detaje të tjera mbi temat konkrete të bisedës me Zampollin, por e lidh takimin me nevojën për forcimin e marrëdhënieve ekonomike dhe krijimin e më shumë mundësive për shqiptarët.