Të shtënat me armë zjarri tronditin Savonën, babai, nëna dhe djali 15-vjeçar humbin jetën në shtëpinë e tyre

Një ngjarje e rëndë ka tronditur opinionin publik, pasi një familje prej tre anëtarësh – një baba, një nënë dhe djali i tyre 15-vjeçar – u gjetën të vdekur brenda banesës së tyre në Finale Ligure, në zonën e Savonës. Të tre viktimat dyshohet se janë qëlluar për vdekje me armë zjarri, ndërsa Karabinierët kanë nisur hetimet për të zbardhur rrethanat dhe orët e fundit të kësaj tragjedie.

Alarmi u ngrit në orët e para të mëngjesit, pasi disa familjarë nuk mundën të kontaktonin me ta dhe njoftuan autoritetet. Ekipet e ndihmës së shpejtë dhe zjarrfikësit, pasi hynë në banesën e vendosur në Via dei Forti di Legnino, nuk mundën të bëjnë gjë tjetër veçse të konstatojnë vdekjen e tre personave.

“Hetimi fillestar është një vrasje-vetëvrasje. Sipas një rindërtimi fillestar, babai qëlloi gruan dhe djalin e tij dhe më pas e drejtoi armën nga vetja,” bëjnë të ditur hetuesit, duke shtuar se kjo hipotezë do të verifikohet përmes ekspertizave mjeko-ligjore dhe testeve balistike.

Në vendngjarje ndërhynë efektivët e Karabinierëve, zjarrfikësit, policia lokale dhe shërbimet mjekësore. Autoritetet po punojnë për të përcaktuar sekuencën e saktë të të shtënave, kohën e ngjarjes, si dhe motivet apo vështirësitë e mundshme me të cilat përballej familja.

Kjo ngjarje vjen vetëm pak ditë pas një tjetër tragjedie të ngjashme të regjistruar në lagjen romake të Pietralatës, ku Luca Abbasciano, 42 vjeç, gruaja e tij Valentina Pambianco, 41 vjeç, dhe vajza e tyre 5-vjeçare Bianca u gjetën të pajetë në banesë, në një rast që po trajtohet gjithashtu si vrasje e dyfishtë e ndjekur nga vetëvrasja.

Në rastin e Romës, hetimet po fokusohen te përdorimi i një arme të mbajtur ligjërisht nga bashkëshorti, ndërsa provat kyçe përfshijnë autopsitë, testet e mbetjeve baruti në duart e çifteve, analizën e pajisjeve celulare dhe gjendjen financiare. Gjatë kontrollit në banesën e familjes romake, e cila ishte e shqetësuar për shëndetin e vajzës, u zbuluan edhe letra që flisnin për vetminë dhe vështirësitë e përballimit të kostove të larta të kurave eksperimentale, përfshirë udhëtimet mjekësore jashtë vendit.

/rtsh.al/