”The Guardian”: Shqipëria ndalon TikTok-un për një vit, pas vdekjes fatale të një adoleshenti

LONDËR, 21 dhjetor /ATSH/ – Shqipëria ka njoftuar një ndalim për një vit të TikTok-ut, pas vrasjes së një adoleshenti muajin e kaluar, që ngjalli frikën mbi ndikimin e mediave sociale te fëmijët, shkruan gazeta prestigjioze britanike ”The Guardian”..

Kryeministri Edi Rama konfirmoi ndalimin, pjesë e një plani më të gjerë për t’i bërë shkollat ​​më të sigurta, pas takimit me grupet e prindërve dhe mësuesit nga i gjithë vendi.

“Për një vit, ne do ta mbyllim plotësisht atë për të gjithë. Nuk do të ketë TikTok në Shqipëri”, tha Rama.

TikTok nuk iu përgjigj menjëherë një kërkese për koment jashtë orarit normal të punës.

Disa vende evropiane, përfshirë Francën, Gjermaninë dhe Belgjikën, kanë vendosur kufizime në përdorimin e mediave sociale për fëmijët.

Në një nga rregulloret më të ashpra në botë që synon teknologjinë e madhe, Australia miratoi në nëntor një ndalim të plotë të mediave sociale për fëmijët nën 16 vjeç.

Rama ka fajësuar mediet sociale, dhe TikTok në veçanti, për nxitjen e dhunës mes të rinjve brenda dhe jashtë shkollës.

Vendimi i qeverisë së tij vjen pasi një nxënës 14-vjeçar u vra me thikë në nëntor nga një nxënës tjetër.

Mediet vendase kishin raportuar se ngjarja erdhi pas debateve mes dy djemve në rrjetet sociale.

Në TikTok ishin shfaqur edhe video të të rinjve që mbështesnin vrasjen.

“Problemi sot nuk janë fëmijët tanë, problemi sot jemi ne, problemi sot është shoqëria jonë, problemi sot është TikTok dhe gjithë të tjerët që po na marrin peng fëmijët”, tha Rama.

Ndalimi pritet të hyjë në fuqi në fillim të vitit të ardhshëm./  a.jor.