Thirrjet raciste, Topi bisedë telefonike me Ivanov: Ngjarja e tejkaluar

Me kërkesë të Presidentit Gjorgje Ivanov, Presidenti Topi zhvilloi një bisedë telefonike me homologun e Republikës së Maqedonisë. Gjatë bisedës Presidenti Ivanov shprehu shqetësimin për situatën e krijuar nga sjellja e disa ushtarëve grekë ditët e fundit ndaj vendeve fqinje. Presidenti Topi i bëri të dituar Presidentit Ivanov se e vlerëson si një ngjarje të izoluar, e cila nuk prek kurrësesi marrëdhëniet e mira që ekzistojnë midis Shqipërisë dhe Greqisë dhe e konsideron atë si një çështje të tejkaluar, i bindur se marrëdheniet mes vendeve tona po zhvillohen gjithnjë e më mirë në funksion të interesave të përbashkëta. Presidenti Topi ka vlerësuar ndjesën e autoriteteve greke për ngjarjen duke ndarë sjelljen e disa individëve nga sjellja institucionale. Presidenti Topi vlerëson se marrëdhëniet në rajonin ballkanik nuk duhet të influencohen nga ngjarje të izoluara.