Tiranë/ Sekuestrohen pasuri me vlerë 420,000 euro në kuadër të operacionit “De facto”

Seksioni për Hetimin e Pastrimit të Parave dhe Aseteve Kriminale në Policinë e Tiranës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, ka ekzekutuar vendimin gjyqësor për sekuestrimin e disa pasurive të paluajtshme me vlerë rreth 420,000 euro.

Operacioni i koduar “De facto” u zhvillua mbi bazën e ligjit nr. 10192, datë 03.12.2009, “Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë”.

Pasuritë e sekuestruara dhe zanafilla e hetimit

Sipas të dhënave zyrtare të bëra me dije nga Policia e Shtetit, masat e sekuestros preventive janë vendosur mbi dy apartamente banimi; një hapësirë parkimi (garazh).

Këto pasuri të paluajtshme dyshohet se e kanë zanafillën nga të ardhura me burim të paligjshëm.

Autoritetet sqaruan se “pasuritë, me vlerë tregu rreth 420 000 euro, dyshohet se janë përfituar nga veprimtaria kriminale e shtetasit H(A). A., 54 vjeç, në fushën e trafikimit të lëndëve narkotike.”

Vijimi i procedurave ligjore

Strukturat hetimore po vijojnë punën me metoda speciale të gjurmimit për të verifikuar nëse ka asete të tjera të regjistruara në emër të subjektit apo personave të tretë të lidhur me të.

“Hetimi vijon për të gjurmuar dhe sekuestruar pasuri të tjera me burime kriminale, të 54-vjeçarit ose shtetasve të lidhur me të.”, thuhet në njoftimin për shtyp.

Materialet e mbledhura gjatë fazës hetimore i kanë kaluar zyrtarisht Prokurorisë së Tiranës për ndjekje të mëtejshme penale.

/rtsh.al/