Topi: Kjo ditë na lejon ti rikthehemi së kaluarës, por ti kthehemi së ardhmes

Tiranë, 28 nëntor NOA - Presidenti i Republikës, Prof. Dr. Bamir Topi nderoi sot kujtimin dhe veprën e lavdishme të të gjithë atdhetarëve që punuan, luftuan dhe dhanë edhe jetën në shërbim të Shqipërisë.

Ai tha se kjo është një ditë, e cila na lejon që ti rikthehemi së kaluarës, por më shumë ti kthehemi së ardhmes sonë.

Në ceremoninë zyrtare të organizuar me këtë rast, Kryetari i Shtetit, në praninë e Kryetares së Kuvendit të Shqipërisë Jozefina Topalli, Kryeministrit Sali Berisha, si dhe përfaqësuesve të tjerë të lartë të institucioneve shtetërore shqiptare, vendosi një kurorë me lule në monumentin Nënë Shqipëri.

Topi vlerësoi se në këtë ditë të veçantë, në ditën e themelimit të shtetit shqiptar është një kënaqësi e veçantë tu uroj të gjithë shqiptarëve kudo ku jetojnë: gëzuar këtë ditë të madhe.

Dhe sot kemi rastin që të rikthejmë në memorien tonë më shumë se kurrë veprën e lavdishme të të gjithë atdhetarëve, patriotëve, të cilët bënë të mundur që të luftohej pa e ndërprerë asnjë moment aktivitetin e tyre, për mbijetesën e shtetit shqiptar, për identitetin e tij dhe kuptohet pas kaq vitesh, ne kemi një Shqipëri jo vetëm me një identitet të qartë, por një vend anëtar të NATO-s dhe së shpejti një vend të Bashkimit Evropian.

e.r/NOA