Tre këshilltarë refuzojnë ekskursionin në shenjë proteste

 
Për një ekskursion në Francë janë shpenzuar 3.5 milion lekë. Vizita, thjesht për turizëm
 
Kukës
Këshilli bashkiak, ekskursion me paratë publike
KUKES- Këshilltarët e Bashkisë së Kukësit kanë përdorur një pjesë të fondit të dhënë për shërbimet publike, për një ekskursion në Francë. Në mesin e dhjetorit, 22 këshilltarë të Bashkisë së Kukësit kanë ndërmarrë një udhëtim turistik 6 ditor në Francë, duke shpenzuar 3.5 milionë lekë të reja. Ndërkohë që udhëtimi i tyre ka qenë thjesht turistik dhe pa asnjë motiv tjetër. Madje bëhet e ditur se aktiviteti i vetëm i këshilltarëve bashkiakë të Kukësit kanë qenë disa foto që kanë bërë tek Harku i Triumfit dhe Kulla Eifel, në qendër të Parisit. Ky veprim ka hasur në reagimin e opinionit qytetar, sidomos të biznesmenëve që paguajnë taksa në bashki.
Bizneset: S'paguajmë taksat
Biznesmenët kanë kërcënuar se nuk do t'i paguajnë taksat bashkisë, pasi ato po shpërdorohen për luksin e këshilltarëve. " Nuk paguajmë taksa për qejfet e këshilltarëve. Me ato para mund të ishin ndërtuar rrugë, lulishte, por edhe ishin kuruar të sëmurë jashtë shtetit",- shprehet i revoltuar T. Dani, përfaqësues i biznesit të vogël që paguan rregullisht taksat pranë bashkisë. Ndërkohë që në shenjë proteste ndaj këtij vendimi absurd kanë braktisur ekskursionin kryetari i këshillit të Bashkisë, Hajri Ademi (këshilltar i pavarur), këshilltari i PDK-së Arben Bilali dhe këshilltari i PR-së, Ylber Elezi. Megjithatë vendet e tyre nuk kanë mbetur bosh, pasi këshilltarët kanë marrë me vete njerëz të afërm të tyre.
Votimi
Këshilli i Bashkisë së Kukësit ka votuar me shumicë dërmuese votash që të ndajë 3.5 milionë lekë për ekskursion. Ky vendim i këshillit të bashkisë nuk është kundërshtuar as nga ana e prefektures, duke e cilësuar si të bazuar në ligj. Ky shpenzim luksi i këshilltarëve bashkiakë bëhet në një ndër bashkitë më të varfra të vendit, ku rreth 50 për qind e familjeve trajtohen me ndihmë ekonomike, e cila nuk i kalon 2 mijë lekë në muaj. Ndërkohë që mësohet se shumica e këtyre këshilltarëve kanë qenë edhe vitin e shkuar në ekskursion në Itali. Këshilli bashkiak përbëhet prej 25 këshilltarësh. Numrin më të madh të këshilltarëve e përbëjnë të pavarurit, të cilët kanë përfituar nga lehtësirat që u ka dhënë ligji zgjedhor, ku disa prej tyre janë shpallur këshilltarë edhe me 100 vota.
Bashkia e varfër
Qeveria miratoi më 5 dhjetor një fond shtesë prej 100 milionë lekësh të reja në buxhetin e vitit 2007, për disa bashki të vendit tonë, midis tyre edhe bashkisë së Kukësit, e cila përfitoi 15 milionë lekë të reja nga fondi total. Në relacionin që ka shoqëruar projektvendimin e qeverisë janë përmendur edhe arsyet e kësaj shtese. Disa nga arsyet kanë qenë gjendja e vështirë financiare e bashkive për përballimin e nevojave të komunitetit për shërbime publike. Gjendjet e vështira të këtyre bashkive sipas relacionit kanë ardhur edhe nga pamundësia e tyre për vjeljen e taksave, sidomos të atyre të biznesit të vogël. Ndërkohë që bashkia e Kukësit bën "rrush e kumbulla" 1/4 e fondit shtesë të akorduar nga qeveria.