Tre të arrestuarit në Lezhë, me kostume atentatori, dyshimet për tri vrasje
Tre të arrestuarit në Lezhë dyshohen për tri vrasje, Piroli dyshohet si ekzekutori kryesor
Elden Tarja, Kristian Ymeri, i njohur edhe si “Shkambi”, dhe Vinçesk Piroli, të arrestuar pak ditë më parë nga Policia e Lezhës, dyshohen për përfshirje në tri vrasje të ndodhura gjatë dy viteve të fundit. Përveç atentatit të dyshuar që po përgatitej në Lezhë, grupi hetimor po verifikon lidhjet e tyre të mundshme me vrasjen e Artan Myrtajt në Sarandë, si dhe me dy ngjarje të tjera kriminale në qarkun e Shkodrës dhe në Mirditë.
Sipas dyshimeve të hetuesve, tre të arrestuarit mund të jenë të përfshirë në veprimtari të vrasjeve me pagesë, ndërsa Vinçesk Piroli dyshohet të ketë pasur rolin e ekzekutorit kryesor në disa prej këtyre ngjarjeve. Megjithatë, këto dyshime janë ende në fazën e hetimit dhe nuk janë konfirmuar përfundimisht.
Tre personat u arrestuan në kuadër të operacionit policor të koduar “Detajet”, pas një pune disa ditore për mbikëqyrjen e lëvizjeve të tyre. Sipas Policisë, Kristian Ymeri dhe Vinçesk Piroli lëviznin të armatosur dhe me skafandra me një motomjet të vjedhur në Suedi, në rrugën e vjetër Pllanë–Lezhë, me dyshimin se po përgatiteshin të kryenin një vrasje.
Sponsorizuar
Ndërkohë, Elden Tarja dyshohet se kishte rolin e bashkëpunëtorit, duke pritur me një automjet tip “Volkswagen” për t’i ndihmuar dy të tjerët të largoheshin nga zona pas kryerjes së krimit të planifikuar.
Policia ndërhyri në aksin Gjadër–Barbullush, ku ndaloi automjetin me të cilin udhëtonin tre të dyshuarit. Gjatë operacionit u sekuestruan tri pistoleta, municion luftarak, motomjeti i dyshuar si i vjedhur në Suedi dhe automjeti “Volkswagen”.
Hetuesit po verifikojnë nëse të arrestuarit kanë lidhje me atentatin e ndodhur më 20 shtator në Sarandë, ku u vra Artan Myrtaj, si dhe me ngjarje të tjera të rënda kriminale. Deri më tani nuk ka një konfirmim zyrtar përfundimtar mbi përfshirjen e tyre në këto vrasje.
Hetimet vijojnë për të dokumentuar rolin e secilit prej të arrestuarve, motivet e dyshuara dhe personat që mund të qëndrojnë pas atentateve të mundshme.